ڈیرہ اسماعیل خان کے علاقے تختی خیل میں دہشت گردوں کے خلاف پولیس، کاؤنٹر ٹیررازم ڈیپارٹمنٹ (سی ٹی ڈی) اور مقامی امن کمیٹی نے ایک کامیاب مشترکہ آپریشن کیا ہے۔ کاروائی کے دوران 2 دہشتگرد ہلاک جبکہ 4 کو گرفتار کر لیا گیا ہے۔
ڈی آئی جی بنوں ریجن سجاد خان کی خصوصی ہدایت پر یہ آپریشن عمل میں لایا گیا۔ دہشت گردوں کے خلاف کاروائی کے لیے بکتر بند گاڑیوں اور جدید اسلحہ سے لیس پولیس اور سی ٹی ڈی کی اضافی نفری کو فوری طور پر تختی خیل روانہ کیا گیا تھا۔ آپریشن کے دوران دونوں جانب سے شدید فائرنگ کا تبادلہ ہوا، جس میں دو دہشت گرد مارے گئے۔ کارروائی کے دوران علاقے کو گھیرے میں لے کر 4 دہشتگردوں کو حراست میں لے لیا گیا ہے۔
برآمدگی اور کلیئرنس آپریشن
پولیس ذرائع کے مطابق کاروائی کے دوران دہشتگردوں کے زیر استعمال 2 موٹر سائیکلیں بھی برآمد کی گئی ہیں۔ ڈی آئی جی سجاد خان نے بتایا کہ علاقے میں تاحال سرچ اور کلیئرنس آپریشن جاری ہے تاکہ کسی بھی مشتبہ فرد یا چھپے ہوئے دہشتگرد کا سراغ لگایا جا سکے۔ پولیس اور قانون نافذ کرنے والے ادارے علاقے میں مکمل کنٹرول حاصل کرنے کے لیے پیش قدمی کر رہے ہیں۔
ڈی آئی جی سجاد خان کا عزم
ڈی آئی جی بنوں ریجن سجاد خان نے آپریشن کی کامیابی پر اطمینان کا اظہار کرتے ہوئے واضح کیا کہ دہشتگردی کے ناسور کو جڑ سے اکھاڑ پھینکیں گے۔ انہوں نے عزم ظاہر کیا کہ امن و امان کی صورتحال کو برقرار رکھنے کے لیے ہر ممکن اقدام اٹھایا جائے گا اور دہشت گردوں کو ان کے منطقی انجام تک پہنچایا جائے گا۔ انہوں نے مزید کہا کہ عوام کی جان و مال کا تحفظ اولین ترجیح ہے اور کسی بھی شرپسند عناصر کو امن تباہ کرنے کی اجازت نہیں دی جائے گی۔