ہالی ووڈ کے مشہور امریکی اداکار اور مقبول ترین ٹی وی سیریز ‘ڈاسنز کریک’ کے مرکزی اسٹار جیمز وان ڈیر بیک 48 سال کی عمر میں انتقال کر گئے۔ اداکار طویل عرصے سے کینسر کے موذی مرض میں مبتلا تھے اور بالآخر زندگی کی بازی ہار گئے۔
اداکار کے اہل خانہ نے سوشل میڈیا کے ذریعے اس افسوسناک خبر کی تصدیق کرتے ہوئے بتایا کہ جیمز وان ڈیر بیک آج صبح اس دارِ فانی سے کوچ کر گئے۔ اہل خانہ کے مطابق انہوں نے اپنی زندگی کے آخری ایام انتہائی حوصلے اور وقار کے ساتھ گزارے۔ سوگوار خاندان نے مداحوں اور میڈیا سے اس مشکل گھڑی میں پرائیویسی کا احترام کرنے کی اپیل کی ہے۔
میڈیا رپورٹس کے مطابق جیمز وان ڈیر بیک آنتوں کے کینسر (کولو ریکٹل کینسر) کا شکار تھے، جس کی تشخیص 2023 میں ہوئی تھی۔ بیماری کے باوجود وہ مسلسل علاج کرواتے رہے اور اس دوران اپنے خاندان کے ساتھ وقت گزارنے کے ساتھ ساتھ سوشل میڈیا کے ذریعے مداحوں سے بھی رابطے میں رہے۔
جیمز وان ڈیر بیک نے ہالی ووڈ میں اپنی جاندار اداکاری کے ذریعے نمایاں مقام حاصل کیا اور انہیں خاص طور پر نوجوان نسل میں بے حد مقبولیت حاصل تھی۔ ان کی وفات کو شوبز انڈسٹری کے لیے ایک بڑا نقصان قرار دیا جا رہا ہے۔ دنیا بھر سے شوبز شخصیات اور مداح انہیں ان کے یادگار کرداروں اور شاندار فنی خدمات پر خراجِ عقیدت پیش کر رہے ہیں۔
دیکھیے: ٹی ٹی پی کے سربراہ نور ولی محسود کی اہلیہ کابل میں انتقال کر گئیں
