Skip to content 
روسی صدر ولادیمیر پیوٹن نے اسلام آباد میں ہونے والے دہشت گرد حملے پر صدرِ مملکت آصف علی زرداری اور وزیرِ اعظم محمد شہباز شریف کو تعزیتی خطوط ارسال کیے ہیں، جن میں قیمتی انسانی جانوں کے ضیاع پر گہرے رنج و غم کا اظہار کیا گیا ہے۔
صدر پیوٹن نے اپنے پیغام میں کہا کہ اسلام آباد میں دہشت گرد حملے کے المناک نتائج پر وہ دلی تعزیت پیش کرتے ہیں۔ انہوں نے کہا کہ ایک مذہبی تقریب کے دوران معصوم افراد کا قتل دہشت گردی کی وحشیانہ اور غیر انسانی فطرت کا ایک اور ثبوت ہے، جس کی روس سخت الفاظ میں مذمت کرتا ہے۔
روسی صدر نے دہشت گردی کے خلاف پاکستان کے ساتھ تعاون کو مزید مضبوط بنانے کے عزم کا اعادہ کرتے ہوئے کہا کہ روس دہشت گردی کے خلاف جنگ میں اپنے پاکستانی شراکت داروں کے ساتھ قریبی تعاون کے لیے تیار ہے۔ ان کا کہنا تھا کہ دہشت گردی ایک مشترکہ خطرہ ہے، جس سے نمٹنے کے لیے عالمی سطح پر مربوط اور مؤثر اقدامات ناگزیر ہیں۔
صدر پیوٹن نے شہداء کے اہل خانہ اور لواحقین کے ساتھ مکمل یکجہتی اور ہمدردی کا اظہار کرتے ہوئے کہا کہ روس اس دکھ کی گھڑی میں پاکستان کے عوام کے ساتھ کھڑا ہے۔ انہوں نے زخمیوں کی جلد صحتیابی کے لیے نیک تمناؤں کا بھی اظہار کیا۔
تعزیتی خط کے اختتام پر روسی صدر نے اس عزم کا اعادہ کیا کہ دونوں ممالک کے درمیان دہشت گردی کے خلاف تعاون کو مزید فروغ دیا جائے گا اور خطے میں امن و استحکام کے لیے مشترکہ کوششیں جاری رکھی جائیں گی۔
دیکھیے: بلوچستان: آپریشن ’ردّالفتنہ-1‘ کامیابی سے مکمل، 216 دہشت گرد ہلاک
