وزیراعظم شہباز شریف کا قطر کا ہنگامی دورہ، عرب اسلامی سربراہی اجلاس میں شرکت اور اہم رہنماؤں سے ملاقاتیں

وزیراعظم شہباز شریف ایک روزہ دورے پر قطر کے دارالحکومت دوحہ پہنچے جہاں انہوں نے ہنگامی عرب اسلامی سربراہی اجلاس میں شرکت کی۔ قطر کے وزیر ثقافت عزت مآب شیخ عبد الرحمن بن حمد بن جاسم بن حمد آل ثانی نے وزیراعظم کا پرتپاک استقبال کیا۔ یہ اجلاس اسرائیل کے حالیہ قطر پر حملے کے بعد بلایا گیا، جس میں خطے کی صورتحال اور مسلم ممالک کے اجتماعی ردعمل پر غور کیا گیا۔

اجلاس میں پاکسان، سعودی عرب، ترکیہ اور ایران سمیت 50 سے زائد مسلم ممالک کے سربراہان نے شرکت کی۔ اجلاس میں شریک تمام مسلم ممالک نے قطر اور فلسطین سے اظہار یکجہتی کا اعلان کیا اور اسرائیلی جارحیت کے خلاف مشترکہ حکمت عملی اپنانے کا فیصلہ کیا۔

ترک صدر رجب طیب اردوان اور سعودی ولی عہد سے ملاقات

قطر میں قیام کے دوران وزیراعظم نے ترکیہ کے صدر رجب طیب اردوان اور سعودی عرب کے ولی عہد شہزادہ محمد بن سلمان بن عبدالعزیز آل سعود سے علیحدہ ملاقاتیں کیں۔

وزیراعظم نے دونوں رہنماؤں سے اسرائیلی جارحیت کے بعد پیدا ہونے والی صورتحال پر تبادلہ خیال کیا اور پاکستان کے بھرپور مؤقف سے آگاہ کیا۔ انہوں نے اس بات پر زور دیا کہ امت مسلمہ کو متحد ہو کر اسرائیل کے خلاف عالمی سطح پر آواز بلند کرنی چاہیے۔

فلسطینی صدر محمود عباس اور امیر قطر سے ملاقات

وزیراعظم شہباز شریف نے فلسطین کے صدر محمود عباس سے بھی ملاقات کی، جنہوں نے گرمجوشی سے وزیراعظم کا استقبال کیا۔ دونوں رہنماؤں نے اسرائیلی جارحیت کی مذمت کی اور فلسطینی عوام کے حق خودارادیت پر زور دیا۔
اسی دوران وزیراعظم نے امیر قطر شیخ تمیم بن حمد آل ثانی سے بھی ملاقات کی۔

انہوں نے قطر کے دارالحکومت پر اسرائیلی حملے کو کھلی جارحیت اور بین الاقوامی قوانین کی خلاف ورزی قرار دیا اور قطر کے ساتھ پاکستان کی مکمل یکجہتی کا اظہار کیا۔

مصر کے صدر عبدالفتاح السیسی سے ملاقات

وزیراعظم نے مصر کے صدر عبدالفتاح السیسی سے بھی اہم ملاقات کی۔ اس موقع پر وزیراعظم نے 9 ستمبر کو قطر پر اسرائیلی جارحیت کی شدید مذمت کی۔

دونوں رہنماؤں نے قطر کے ساتھ یکجہتی کا اظہار کیا اور اسرائیل کی جانب سے خطے کے امن کو سبوتاژ کرنے کی کوشش کو غیر ذمہ دارانہ قرار دیا۔ وزیراعظم نے مصر کی فعال سفارتکاری کو سراہا اور کہا کہ دوحہ سربراہی اجلاس امت مسلمہ کے اتحاد کی علامت ہے۔ دونوں رہنماؤں نے باہمی تعلقات کو مزید فروغ دینے پر بھی اتفاق کیا، خاص طور پر تجارت، سرمایہ کاری اور صحت کے شعبوں میں مزید تعاون پر اتفاق کیا گیا۔

سعودی ولی عہد شہزادہ محمد بن سلمان سے تفصیلی تبادلہ خیال

سعودی ولی عہد شہزادہ محمد بن سلمان کے ساتھ ملاقات میں وزیراعظم نے اسرائیلی جارحیت کو خطے کے امن کے لیے سنگین خطرہ قرار دیا۔ انہوں نے ولی عہد کی قائدانہ صلاحیتوں کو سراہا اور کہا کہ اس وقت امت مسلمہ کو متحد کرنے میں سعودی عرب کا کردار کلیدی ہے۔

وزیراعظم نے یقین دہانی کرائی کہ پاکستان اقوام متحدہ کی سلامتی کونسل سمیت تمام عالمی فورمز پر سعودی عرب اور مسلم دنیا کے مؤقف کی حمایت کرے گا۔ دونوں رہنماؤں نے پاکستان اور سعودی عرب کے تاریخی اور برادرانہ تعلقات کو مزید وسعت دینے پر اتفاق کیا۔

اردن کے فرمانروا شاہ عبداللہ دوم سے ملاقات

وزیراعظم نے اردن کے فرمانروا شاہ عبداللہ دوم بن الحسین سے بھی ملاقات کی اور اسرائیل کی حالیہ جارحیت کو مشرق وسطیٰ کے امن عمل کو سبوتاژ کرنے کی کوشش قرار دیا۔

وزیراعظم نے فلسطینی کاز کے لیے شاہ عبداللہ دوم کی مستقل حمایت اور قائدانہ کردار کو سراہا۔ دونوں رہنماؤں نے اتفاق کیا کہ مسلم دنیا کو متحد ہو کر عالمی برادری کو متحرک کرنا ہوگا تاکہ امن و استحکام قائم کیا جا سکے۔

وزیراعظم کا خطاب

وزیراعظم نے قطر کے دارالحکومت دوحا میں منعقدہ عرب اسلامک سمٹ کے اجلاس ے خطاب کرتے ہوئے کہا کہ ہم ایک اہم اور افسوسناک واقعے کے تناظر میں اکٹھے ہوئے ہیں اسرائیل نے ہمارے برادر ملک قطر کی خودمختاری اور سلامتی کی خلاف ورزی کی ہے۔

وزیراعظم نے واضح کہا کہ پاکستان قطر کے ساتھ مکمل یکجہتی کا اظہار کرتا ہے اسرائیل کا قطر پر حملہ جارحانہ اقدامات کا تسلسل ہے۔ اسرائیلی جارحیت کے ذریعے امن کی کوششوں کو شدید دھچکا لگا ہے اس جارحیت کے بعد سوال ہےکہ اسرائیل نے مذاکرات کا ڈھونگ کیوں رچایا؟

ان کا کہنا تھا کہ اسرائیل کی جانب سے عالمی قوانین کی دھجیاں اڑانا قابل مذمت ہے غزہ میں انسانیت سسک رہی ہے غزہ میں شہری آبادی کو فوری اور ہنگامی بنیادوں پر امداد کی فراہمی کا مطالبہ کرتے ہیں ہم نے اجتماعی دانش سے اقدامات نہ کیے تو تاریخ معاف نہیں کرے گی۔

شہباز شریف کی وطن واپسی

قطر کا ایک روزہ دورہ مکمل کرنے کے بعد وزیراعظم محمد شہباز شریف وطن واپس روانہ ہوگئے۔ دوحہ ائیرپورٹ پر قطر کے وزیر ثقافت شیخ عبد الرحمن بن حمد بن جاسم بن حمد آل ثانی نے وزیراعظم کو پرتپاک انداز میں الوداع کیا۔

دیکھیں: قطر کے بعد ترکی؟ اسرائیلی میڈیا نے ترکی کو اسرائیل کا اگلا مبینہ نشانہ قرار دے دیا