ڈھاکہ پولیس نے انکشاف کیا ہے کہ عثمان ہادی کے قتل کے دو مرکزی ملزمان فیصل کریم مسعود اور عالمگیر شیخ بھارت فرار ہو گئے ہیں اور انہوں نے ریاست میگھالیہ میں پناہ لی ہے۔ تفصیلات کے مطابق ڈھاکہ میٹروپولیٹن پولیس کے ایڈیشنل کمشنر ایس این محمد نذر الاسلام نے پریس کانفرنس کرتے ہوئے کہا ہے کہ عثمان ہادی کا قتل باقاعدہ منصوبہ بندی سے کیا گیا تھا۔ ڈھاکا پولیس نے اب تک 11 افراد کو گرفتار کرلیا ہے جن میں وہ لوگ بھی شامل ہیں جنہوں نے ملزمان کو فرار ہونے میں مدد فراہم کی۔
ایڈیشنل کمشنر نذر الاسلام نے بتایا کہ موقع پر موجود افراد کی معلومات، سی سی ٹی وی فوٹیج اور انفارمیشن ٹیکنالوجی کی بنیاد پر پولیس نے فیصل کریم مسعود اور عالمگیر شیخ کو واقعے کے روز ہی شناخت کر لیا تھا۔
پولیس کے مطابق قتل میں استعمال ہونے والے دو غیر ملکی پستول، میگزین، 52 گولیاں اور ایک شاٹ گن برآمد کی گئی ہیں۔ اس کے علاوہ ایک موٹر سائیکل، جعلی نمبر پلیٹیں اور گولیوں کے خالی خول بھی ضبط کیے گئے ہیں۔ پولیس نے تقریباً 53 بینک اکاؤنٹس کے دستخط شدہ چیکس بھی برآمد کیے ہیں، جن کی مالیت 218 کروڑ ٹکا بتائی جاتی ہے۔
