فیلڈ مارشل سید عاصم منیر نے کہا ہے کہ بلوچستان کی پائیدار ترقی کے لیے ذاتی مفادات پر مبنی سیاسی ایجنڈوں کو مسترد کرنا ناگزیر ہے۔ تفصیلات کے مطابق بدھ کے روز جی ایچ کیو میں منعقدہ بلوچستان سے متعلق 18ویں نیشنل ورکشاپ سے خطاب کرتے ہوئے انہوں نے صوبے کی سماجی و اقتصادی ترقی اور قومی مفادات میں اس کی اسٹریٹجک اہمیت پر روشنی ڈالی۔
انہوں نے وفاقی اور صوبائی حکومتوں کے ترقیاتی اقدامات کو سراہا اور عوام کے مفادات کو سامنے رکھتے ہوئے حکمت عملی بنانے پر زور دیا۔
سکیورٹی صورتحال پر بات کرتے ہوئے انہوں نے کہا کہ بھارت کی سرپرستی میں سرگرم عناصر بدستور بلوچستان میں تشدد پھیلانے اور ترقیاتی عمل کو سبوتاژ کرنے کی کوششوں میں مصروف ہیں۔ انہوں نے واضح کیا کہ سکیورٹی فورسز ان عناصر کے عزائم کو ناکام بنانے کے لیے کارروائیاں جاری رکھیں گی۔
فیلڈ مارشل عاصم منیر نے سول سوسائٹی کے تعمیری کردار کو سراہا۔ انہوں نے کہا کہ ملک کی علاقائی سالمیت کی کسی بھی قسم کی خلاف ورزی کا فیصلہ کن جواب دیا جائے گا۔
دیکھیں: افغان مہاجرین سے متعلق ماہرہ خان کا بیان اور پاکستان کو درپیش سیکیورٹی خدشات