ضلع بنوں کے علاقے جانی خیل کے زندی علی خیل میں سیکیورٹی فورسز نے خفیہ اطلاع پر کارروائی کرتے ہوئے سات دہشت گردوں کو ہلاک کر دیا ہے۔
سیکیورٹی ذرائع کے مطابق کارروائی مخصوص انٹیلی جنس معلومات کی بنیاد پر کی گئی، جس میں دہشت گردوں کے ایک ٹھکانے کو نشانہ بنایا گیا۔ فائرنگ کے تبادلے کے دوران ساتوں دہشت گرد مارے گئے، جن کا تعلق کالعدم تنظیم سے بتایا جا رہا ہے۔
ذرائع کا کہنا ہے کہ ہلاک ہونے والے دہشت گرد علاقے میں سیکیورٹی فورسز اور عام شہریوں پر حملوں کی منصوبہ بندی میں ملوث تھے۔ کارروائی کے دوران اسلحہ اور گولہ بارود بھی برآمد کیا گیا ہے۔
علاقے میں کلیئرنس اور سرچ آپریشن جاری ہے تاکہ کسی ممکنہ سہولت کار یا مزید دہشت گرد عناصر کی موجودگی کو یقینی طور پر ختم کیا جا سکے۔ سیکیورٹی حکام کے مطابق ملک سے دہشت گردی کے مکمل خاتمے تک ایسی کارروائیاں جاری رہیں گی۔