افغانستان کے نائب وزیرِ صنعت و تجارت مولوی احمداللہ زاہد ایک اعلیٰ سطحی سرکاری وفد اور تقریباً 50 افغان تاجروں کے ہمراہ بنگلہ دیش کے سرکاری دورے پر روانہ ہو گئے ہیں۔ افغانستان کی وزارتِ صنعت و تجارت کے مطابق یہ دورہ اتوار کے روز شروع ہوا۔
وزارت کی جانب سے جاری بیان میں کہا گیا ہے کہ اس دورے کے دوران افغانستان اور بنگلہ دیش کے درمیان دوطرفہ تجارتی تعلقات، تجارت کے فروغ اور باہمی اقتصادی تعاون پر تفصیلی بات چیت کی جائے گی۔ بیان کے مطابق برآمدات و درآمدات میں سہولت کاری، مشترکہ سرمایہ کاری کے مواقع اور تجارتی تعاون کو مضبوط بنانے کے طریقوں پر بھی جامع مذاکرات ہوں گے۔
اس کے علاوہ دونوں ممالک کے درمیان مشترکہ مفاہمتی یادداشتوں پر دستخط کے امکانات پر بھی غور کیا جائے گا۔ وزارتِ صنعت و تجارت کا کہنا ہے کہ اس دورے کا بنیادی مقصد افغان تاجروں کے لیے نئی منڈیوں کی تلاش، افغان مصنوعات کی برآمدات کے مواقع میں توسیع اور علاقائی سطح پر اقتصادی تعاون کو فروغ دینا ہے۔
بیان میں مزید کہا گیا کہ اس نوعیت کے سرکاری و تجارتی دورے ملک کی اقتصادی ترقی، تجارت کے فروغ اور قومی معیشت کو مضبوط بنانے میں نہایت اہم اور مؤثر کردار ادا کرتے ہیں۔
دیکھیں: معرکۂ حق میں کامیابی کے بعد پاکستان کے دفاعی ساز و سامان کی مانگ میں اضافہ: وزیراعظم