ایران کے رہبرِ اعلیٰ آیت اللہ علی خامنہ ای کے مشیر کمال خرازی نے مسقط میں امریکہ کے ساتھ ہونے والے مذاکرات کے ابتدائی مرحلے کو مثبت قرار دیتے ہوئے کہا ہے کہ بات چیت کا آغاز اطمینان بخش رہا ہے اور توقع ہے کہ سفارتی عمل مناسب انداز میں آگے بڑھے گا۔
اطلاعات کے مطابق کمال خرازی کا کہنا تھا کہ مذاکرات کے نتائج کا انحصار دونوں فریقوں کے طرزِ عمل پر ہوگا، اور آئندہ مراحل میں مختلف امکانات موجود رہیں گے۔ ان کا کہنا تھا کہ ایران کے خلاف دیگر ذرائع سے خاطر خواہ نتائج حاصل نہ ہونے کے بعد واشنگٹن نے اب سفارتی راستہ اختیار کیا ہے۔
ایرانی خبر رساں ادارے اسنا کے مطابق ایران مذاکراتی عمل کو جاری رکھنے کا خواہاں ہے، تاہم حتمی پیش رفت عملی اقدامات سے مشروط ہوگی۔ واضح رہے کہ ایران اور امریکہ کے درمیان حالیہ مذاکرات 7 فروری کو عمان کے دارالحکومت مسقط میں منعقد ہوئے، جنہیں دونوں ممالک کے درمیان سفارتی رابطوں کے تناظر میں اہم پیش رفت قرار دیا جا رہا ہے۔
دیکھیے: ازبک صدر شوکت مرزایوف دو روزہ دورے پر پاکستان پہنچ گئے
