بھارت کو آئی سی سی مینز ٹی ٹوئنٹی ورلڈ کپ 2026 کے اہم ترین معرکے سے قبل ایک بڑا دھچکا لگا ہے۔ بھارتی ٹیم کے جارح مزاج اوپنر ابھیشیک شرما معدے کے شدید انفیکشن کے باعث تاحال مکمل صحت یاب نہیں ہو سکے، جس کی وجہ سے اتوار کو کولمبو میں شیڈول پاک بھارت ٹاکرے میں ان کی شرکت مشکوک ہو گئی ہے۔
ہسپتال منتقلی اور کپتان کا بیان
بھارتی میڈیا رپورٹس کے مطابق ابھیشیک شرما کی طبیعت 6 فروری کو ممبئی میں نیٹ سیشن کے بعد ناساز ہوئی تھی۔ وہ امریکہ کے خلاف میچ میں بھی مکمل فٹ نہیں تھے اور اسی علالت کے باعث پہلی ہی گیند پر پویلین لوٹ گئے تھے۔ بعد ازاں نمیبیا کے خلاف میچ کے لیے دہلی پہنچنے پر ان کی طبیعت مزید بگڑ گئی، جس کے باعث انہیں ہسپتال منتقل کرنا پڑا۔ اگرچہ انہیں ہسپتال سے ڈسچارج کر دیا گیا ہے، تاہم وہ تاحال مکمل فٹنس حاصل کرنے میں ناکام ہیں۔
پاک بھارت ٹاکرے پر اثرات
نمیبیا کے خلاف میچ کے دوران بھارتی کپتان سوریا کمار یادیو نے ٹاس کے موقع پر تصدیق کی کہ ابھیشیک شرما ابھی تک مکمل فٹ نہیں ہیں اور خدشہ ہے کہ وہ اگلے ایک سے دو میچز مِس کر سکتے ہیں۔ کپتان کے اس بیان نے 15 فروری کو پاکستان کے خلاف ہونے والے بڑے مقابلے میں ابھیشیک کی شمولیت پر سوالیہ نشان لگا دیا ہے۔
گروپ اے کا یہ سب سے بڑا مقابلہ کولمبو میں کھیلا جانا ہے، جہاں بھارتی ٹیم کو اپنے اہم اوپنر کی عدم موجودگی میں بیٹنگ لائن میں تبدیلی کرنا پڑ سکتی ہے۔ کرکٹ شائقین اور ماہرین اسے بھارت کے لیے ایک بڑا نقصان قرار دے رہے ہیں۔
دیکھیے: اڈانی گروپ کے خلاف تحریروں پر بھارتی صحافی کو قانونی کاروائی کا سامنا