چیئرمین پاکستان علماء کونسل حافظ محمد طاہر محمود اشرفی نے غزہ امن بورڈ کے اجلاس کے حوالے سے کہا ہے کہ پاکستان اور دیگر اسلامی ممالک کی اس فورم میں شمولیت اہلِ فلسطین کی حمایت اور ان کے حقوق کے تحفظ کے لیے ہے۔ ان کا کہنا تھا کہ پاکستان کی عوام اور ریاست کا فلسطین کے مسئلے پر مؤقف ایک اور متفقہ ہے، تاہم بعض عناصر سیاسی مقاصد کے لیے اس معاملے پر قوم میں تقسیم پیدا کرنے کی کوشش کر رہے ہیں۔
انہوں نے کہا کہ وزیر اعظم شہباز شریف اور فیلڈ مارشل عاصم منیر نے ہمیشہ فلسطین کے معاملے پر امتِ مسلمہ کی ترجمانی کی ہے۔ مولانا طاہر اشرفی نے امید ظاہر کی کہ غزہ امن بورڈ کے حالیہ اجلاس میں بھی وزیر اعظم پاکستان فلسطین کے مسئلے پر ملک کے اصولی مؤقف کو بھرپور انداز میں پیش کریں گے۔
ان کا کہنا تھا کہ پاکستان کا مؤقف واضح ہے کہ ایک آزاد اور خود مختار فلسطینی ریاست کا قیام، جس کا دارالحکومت القدس شریف ہو، غزہ کی فوری تعمیرِ نو، مکمل جنگ بندی اور اسرائیلی جارحیت و بربریت کا خاتمہ۔ انہوں نے کہا کہ اسلامی ممالک کی ذمہ داری ہے کہ وہ متحد ہو کر فلسطینی عوام کے حقوق کے لیے آواز بلند کریں اور عملی اقدامات کی حمایت کریں۔