شمالی وزیرستان سے تعلق رکھنے والی کم عمر کرکٹر آئینہ وزیر کی باؤلنگ ویڈیو وائرل ہونے کے بعد جہاں ان کے ٹیلنٹ کی پذیرائی ہو رہی ہے، وہیں ان کے خاندانی پس منظر اور علاقے کی صورتحال سے متعلق متضاد بیانیے بھی سامنے آئے ہیں۔ پشاور زلمی کے سربراہ جاوید آفریدی نے آئینہ وزیر کی مہارت کو سراہتے ہوئے انہیں ‘زلمی ویمن لیگ’ کے تربیتی پروگرام میں شامل کرنے کا باقاعدہ اعلان کیا ہے، تاکہ انہیں قومی سطح پر اپنی صلاحیتیں منوانے کا موقع مل سکے۔
سوشل میڈیا مہم اور پذیرائی
آئینہ وزیر کی ویڈیو سوشل میڈیا صارف بادشاہ پشتین کی جانب سے شیئر کیے جانے کے بعد وائرل ہوئی، جس پر معروف اسپورٹس جرنلسٹ احتشام الحق سمیت کئی شخصیات نے تبصرہ کرتے ہوئے انہیں پاکستان ویمن کرکٹ کا مستقبل قرار دیا۔ سابق رکنِ اسمبلی محسن داؤر نے بھی آئینہ وزیر کی ہمت کو سراہتے ہوئے انکشاف کیا کہ وہ چند ماہ قبل جاں بحق ہونے والے مقامی استاد عمر گل کی صاحبزادی ہیں۔
کے پی حکومت کا فیکٹ چیک اور حقائق
دوسری جانب، خیبر پختونخوا حکومت کے آفیشل ‘فیکٹ چیک’ سیل نے آئینہ وزیر کے حوالے سے سوشل میڈیا پر جاری بعض دعوؤں کو گمراہ کن اور مربوط ڈس انفارمیشن مہم کا حصہ قرار دیا ہے۔ رپورٹ کے مطابق، سوشل میڈیا پر یہ تاثر دیا جا رہا تھا کہ آئینہ وزیر کے آبائی شہر کا واحد فعال اسکول ریاستی اداروں نے تباہ کیا، تاہم مقامی ذرائع نے ان دعوؤں کی تردید کی ہے۔
فیکٹ چیک رپورٹ میں واضح کیا گیا ہے کہ آئینہ وزیر کے والد، استاد عمر گل کو شدت پسند گروہ ‘ایف اے کے’ (FAK) کی جانب سے تدریس چھوڑنے کے لیے مسلسل دھمکیاں موصول ہو رہی تھیں۔ ان دھمکیوں کے باوجود انہوں نے اپنا کام جاری رکھا، جس کے بعد 2025 میں اسی شدت پسند گروہ نے انہیں اغوا کے بعد قتل کر دیا۔ مزید برآں، شمالی وزیرستان کے علاقے شیوا میں لڑکیوں کے اسکول کو بھی مئی 2024 میں انہی شدت پسند عناصر نے بارودی مواد سے اڑایا تھا۔
حکومتی اعلامیے میں کہا گیا ہے کہ مخصوص نیٹ ورکس ایک بچے کی وائرل ویڈیو کے جذباتی اثر کا فائدہ اٹھا کر ریاستی اداروں کو بدنام کرنے اور شدت پسندوں کے کردار کو چھپانے کی کوشش کر رہے ہیں۔ آئینہ وزیر کا یہ سفر جہاں ان کے ذاتی عزم کی داستان ہے، وہیں یہ خطے میں تعلیم اور کھیلوں کے دشمن عناصر کے خلاف ایک مضبوط بیانیہ بن کر ابھرا ہے۔
دیکھیے: عمران خان کی صحت، قانونی حقوق اور احتجاجی سیاست پر سیاسی محاذ آرائی تیز
