آئی سی سی نے ٹی ٹوئنٹی ورلڈ کپ 2028 کے لیے براہِ راست کوالیفائی کرنے والی ٹیموں کے حوالے سے صورتحال واضح کر دی ہے۔ تازہ ترین اعلامیے کے مطابق بنگلہ دیش، افغانستان اور آئرلینڈ اپنی مستحکم عالمی درجہ بندی کی بنیاد پر ایونٹ میں براہِ راست شرکت کریں گے۔
آئی سی سی کے قوانین کے مطابق ایونٹ کے سپر ایٹ مرحلے تک رسائی حاصل کرنے والی ٹیمیں خودکار طور پر اگلے ایڈیشن کے لیے کوالیفائی کر جاتی ہیں۔ تاہم نیوزی لینڈ اور آسٹریلیا میزبان ہونے کے ناطے پہلے ہی ایونٹ کا حصہ بن چکے ہیں۔ باقی ماندہ ٹیموں کا فیصلہ آئی سی سی کی عالمی ٹی ٹوئنٹی رینکنگ کی بنیاد پر ہونا ہے، جس کے لیے 9 مارچ کی تاریخ مقرر کی گئی ہے۔
موجودہ صورتحال میں بنگلادیش نویں افغانستان دسویں اور آئرلینڈ بارہویں نمبر پر موجود ہیں۔ چونکہ 9 مارچ سے قبل ان ٹیموں کا کوئی بین الاقوامی میچ شیڈول نہیں، اس لیے ان کی رینکنگ میں کسی بڑی تبدیلی کا امکان ختم ہو گیا ہے۔ اسی بنیاد پر آئی سی سی نے ان تینوں ٹیموں کی 2028ء کے عالمی میلے میں براہِ راست شرکت کی تصدیق کر دی ہے، جس سے کرکٹ حلقوں میں جاری قیاس آرائیوں کا خاتمہ ہو گیا ہے۔
خیال رہے کہ حالیہ ٹی ٹوئنٹی ورلڈ کپ میں بنگلہ دیش کی عدمِ شرکت کے باعث سوالات جنم رہے تھے کہ آیا ٹیم کے اگلے ایڈیشن میں بنگلہ دیش کی براہِ راست جگہ بنا پائے گی یا نہیں۔
واضح رہے کہ 2028 کا ٹی ٹوئنٹی ورلڈ کپ بھی 20 ٹیموں پر مشتمل ہوگا، جن میں سے 8 ٹیمیں کوالیفائنگ مرحلے کے ذریعے ایونٹ میں جگہ بنائیں گی، جبکہ بقیہ ٹیموں کی پوزیشن کارکردگی، رینکنگ اور میزبان حیثیت کی بنیاد پر طے کی جا رہی ہے
دیکھیے: پاکستانی کرکٹ کا بحران: محض شکست نہیں، بلکہ نظام کا زوال
