آپریشن سوئفٹ ریٹارٹ کی سات سال مکمل ہونے پر پاکستان کی عسکری قیادت نے مسلح افواج کے افسران اور جوانوں کی بہادری اور عظیم قربانیوں کو بھرپور خراجِ تحسین پیش کیا ہے۔ آئی ایس پی آر کے مطابق فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی امیر البحر ایڈمرل نوید اشرف اور پاک فضائیہ کے سربراہ ایئر چیف مارشل ظہیر احمد بابر سدھو نے اس تاریخی دن کی مناسبت سے قوم کے دفاع کے غیر متزلزل عزم کو دہرایا ہے۔
بھارتی جارحیت کا فیصلہ کن جواب
عسکری قیادت نے اپنے پیغام میں واضح کیا کہ 27 فروری 2019 کو شروع ہونے والا ‘آپریشن سویفٹ ریٹارٹ’ بھارت کی بلاوجہ جارحیت کے جواب میں ایک ایسی فیصلہ کن کاروائی تھی جس نے پاکستان کے قومی وقار اور خود مختاری کو برقرار رکھا۔ اس آپریشن نے نہ صرف پاکستان کی مسلح افواج کی اعلیٰ عملی مہارت اور ہمہ وقت تیاری کو ثابت کیا بلکہ خطے میں اسٹریٹجک توازن کو بحال کرتے ہوئے دشمن کی مزید جارحیت کے عزائم کو خاک میں ملا دیا۔
قومی سلامتی
فیلڈ مارشل اور سروس چیفس نے پاکستان کی قومی سلامتی اور خطے میں پائیدار امن کے حصول کے لیے اپنے عزم کا اعادہ کرتے ہوئے زور دیا کہ مسلح افواج ہر قسم کے خطرے کا مقابلہ کرنے کے لیے مکمل طور پر تیار ہیں۔ عسکری قیادت نے اس عزم کو دہرایا کہ پاکستان کی افواج قوم کے تحفظ کے لیے ہر دم ہوشیار ہیں اور عالمی سطح پر استحکام و امن کے فروغ میں اپنا فعال کردار ادا کرتی رہیں گی۔ یہ دن اس حقیقت کی یاد دہانی کراتا ہے کہ وطنِ عزیز کا دفاع ناقابلِ تسخیر ہاتھوں میں ہے۔
دیکھیے: اب ہماری تمہاری کھلی جنگ ہے؛ خواجہ آصف کا افغان طالبان رجیم کو سخت پیغام
