خیبر پختونخوا کے ضلع بنوں میں تھانہ ہوید کی حدود، علاقہ ممہ خیل میں دہشت گردوں نے پولیس کی گاڑی کو بزدلانہ کاروائی کا نشانہ بنایا ہے۔ پولیس ذرائع کے مطابق طالبان سے منسلک شرپسند عناصر نے پولیس موبائل وین پر اس وقت اندھا دھند فائرنگ کی جب وہ معمول کے گشت پر تھی، جس کے نتیجے میں پولیس کے اے ایس آئی شہید جبکہ ایک اہلکار زخمی ہو گیا۔ واقعے کے فوری بعد حملہ آوروں نے پولیس کی گاڑی کو آگ لگا دی، جس سے وین مکمل طور پر تباہ ہو گئی۔
سکیورٹی آپریشن
واقعے کی اطلاع ملتے ہی سکیورٹی فورسز اور پولیس کی بھاری نفری، بشمول بکتر بند گاڑیاں موقع پر روانہ کر دی گئی ہیں۔ رپورٹ کے مطابق جائے وقوع پر پولیس اور دہشت گردوں کے مابین فائرنگ کا تبادلہ بھی ہوا، جس کے بعد پورے علاقے کو گھیرے میں لے کر بڑے پیمانے پر سرچ آپریشن شروع کر دیا گیا ہے۔ زخمی اہلکار کو فوری طبی امداد کے لیے قریبی ہسپتال منتقل کر دیا گیا ہے، جہاں ڈاکٹروں کی ٹیم اسے بہترین طبی سہولیات فراہم کر رہی ہے۔
وزیراعلیٰ کی مذمت
وزیراعلیٰ خیبرپختونخوا محمد سہیل آفریدی نے بنوں واقعے کا سخت نوٹس لیتے ہوئے آئی جی پولیس سے تفصیلی رپورٹ طلب کر لی ہے۔ انہوں نے اے ایس آئی کی شہادت پر گہرے رنج و غم کا اظہار کرتے ہوئے واقعے کی شدید مذمت کی اور کہا کہ دہشت گردوں کی ایسی بزدلانہ کاروائیاں فورسز کے حوصلے پست نہیں کر سکتیں۔
وزیراعلیٰ نے انتظامیہ کو زخمی اہلکار کی بہترین دیکھ بھال یقینی بنانے کی ہدایت کی اور واضح کیا کہ صوبائی حکومت شہید کے اہل خانہ کے ساتھ مکمل یکجہتی کے ساتھ کھڑی ہے۔