کراچی: پاکستانی اداکارہ علیزے شاہ نے نوجوان اداکارہ عینا آصف کے حق میں کھل کر حمایت کا اظہار کرتے ہوئے شوبز انڈسٹری میں نئے فنکاروں کے ساتھ رویے پر سوالات اٹھا دیے۔
علیزے شاہ نے اپنے انسٹاگرام اکاؤنٹ پر عینا آصف کا ویڈیو کلپ شیئر کرتے ہوئے کہا کہ انڈسٹری میں بعض سینئر فنکار نئے یا کم تجربہ کار اداکاروں کو وہ مقام نہیں دیتے جس کے وہ مستحق ہوتے ہیں، بلکہ بعض اوقات انہیں نیچا دکھانے کی کوشش کی جاتی ہے۔
انہوں نے عینا آصف کی صلاحیتوں کو سراہتے ہوئے کہا کہ وہ اپنی نسل کی بہترین اداکاراؤں میں سے ایک ہیں اور غیر معمولی جذباتی ذہانت رکھتی ہیں۔
علیزے شاہ کا کہنا تھا کہ کم عمر لڑکیوں کے ساتھ اس طرح کا رویہ اکثر دیکھنے میں آتا ہے، خاص طور پر ان فنکاروں کے ساتھ جو شوبز پس منظر سے تعلق نہیں رکھتے۔
انہوں نے عینا آصف کی ہمت کو سراہتے ہوئے کہا کہ اپنے تجربات کھل کر بیان کرنا نہ صرف جرات مندانہ اقدام ہے بلکہ دیگر نوجوان فنکاروں کیلئے بھی حوصلہ افزا مثال ہے۔
واضح رہے کہ عینا آصف نے حال ہی میں ایک پروگرام میں انکشاف کیا تھا کہ بعض سینئر اداکار انہیں نظر انداز کرتے ہیں اور طنز کا نشانہ بھی بناتے ہیں، جس کے بعد سوشل میڈیا پر اس موضوع پر بحث چھڑ گئی۔
دیکھئیے:وائرل ہونے کی ہوس میں گلیمر کوئن کا جعلی اغوا ڈرامہ؛ انفلوئنسر گرفتار