اسلام آباد: پاکستانی خاتون ایڈونچر ایتھلیٹ ثمر خان نے تاریخ رقم کرتے ہوئے آرکٹک میں منعقد ہونے والا انتہائی مشکل “فیل راؤن پولر چیلنج” کامیابی سے مکمل کر لیا، وہ یہ اعزاز حاصل کرنے والی پہلی پاکستانی بن گئی ہیں۔
تفصیلات کے مطابق یہ مہم تقریباً 300 کلومیٹر طویل تھی، جو شدید سردی اور برفانی طوفانی حالات میں ڈاگ سلیج کے ذریعے مکمل کی گئی۔ چیلنج کا آغاز سویڈن سے ہوا اور اختتام ناروے میں ہوا۔
ذرائع کے مطابق اس مہم کے دوران درجہ حرارت منفی درجنوں ڈگری تک گر گیا، جبکہ کھلاڑیوں کو برفانی میدانوں، تیز ہواؤں اور محدود وسائل کے ساتھ کئی روز تک سفر کرنا پڑا، جسے دنیا کے مشکل ترین ایڈونچر چیلنجز میں شمار کیا جاتا ہے۔
ثمر خان نے کامیابی کے بعد اپنے پیغام میں کہا کہ یہ کارنامہ ان تمام لوگوں کیلئے جواب ہے جو سمجھتے تھے کہ وہ یہ نہیں کر سکتیں۔ “میں نے ثابت کیا کہ ہم سب کچھ کر سکتے ہیں۔”
انہوں نے اپنی کامیابی پاکستان کے نام کرتے ہوئے کہا کہ اس مہم کے دوران انہیں سخت موسمی حالات، جسمانی تھکن اور ذہنی دباؤ کا سامنا رہا، مگر عزم اور حوصلے سے یہ چیلنج مکمل کیا۔
ماہرین کے مطابق یہ کامیابی نہ صرف پاکستان کیلئے اعزاز ہے بلکہ خواتین کی صلاحیتوں اور ایڈونچر اسپورٹس میں ان کی بڑھتی ہوئی شرکت کی بھی عکاس ہے۔
دیکھئیے:ورلڈ اسکواش کوالیفائرز: پاکستان کے عاصم خان سیمی فائنل میں پہنچ گئے
