کراچی: سینئر اداکارہ فضیلہ قاضی نے ملک میں بنیادی سہولیات کی صورتحال پر تشویش کا اظہار کرتے ہوئے کہا ہے کہ انہیں حکومت، معیشت اور کرکٹ سے کوئی خاص امید نہیں رہی۔
نجی ٹی وی پروگرام میں گفتگو کرتے ہوئے فضیلہ قاضی کا کہنا تھا کہ عام شہری آج کل اپنے زورِ بازو پر زندگی گزارنے پر مجبور ہیں کیونکہ بنیادی سہولیات تک رسائی بھی مشکل ہو چکی ہے۔
انہوں نے کہا کہ جس شخص کے بچوں کو کھانا میسر نہ ہو، وہ سب سے پہلے ان کی ضروریات پوری کرنے کے بارے میں سوچے گا، ایسے میں وہ اپنے حقوق کیلئے آواز کیسے اٹھا سکتا ہے۔
اداکارہ کے مطابق عوام کو مسائل میں الجھا کر رکھا جاتا ہے تاکہ وہ سوال نہ کر سکیں۔ “اگر لوگوں کو تمام سہولیات فراہم کر دی جائیں تو وہ اپنے حقوق کیلئے کھڑے ہو جائیں گے۔”
فضیلہ قاضی نے اپنی مثال دیتے ہوئے کہا کہ وہ ایک پوش علاقے میں رہتی ہیں لیکن اس کے باوجود گیس اور پانی جیسی بنیادی سہولیات میسر نہیں۔ ان کے مطابق بارش کے بعد سے گیس دستیاب نہیں جبکہ پانی ٹینکر کے ذریعے حاصل کرنا پڑتا ہے۔
انہوں نے مزید کہا کہ بجلی کے بلوں میں مسلسل اضافہ ہو رہا ہے لیکن سہولیات میں بہتری نہیں آئی، جو تشویشناک صورتحال ہے۔
اداکارہ کا کہنا تھا کہ ماضی میں صورتحال نسبتاً بہتر تھی مگر اب حالات بدل چکے ہیں۔ آخر میں انہوں نے کہا کہ اب وہ اپنی امیدیں صرف اللہ سے وابستہ رکھتی ہیں۔
دیکھئیے:تیل بحران: شوبز شخصیات کی عوام سے ایندھن بچانے کی اپیل، ذمہ دارانہ رویے پر زور