اسلام آباد: مشرقِ وسطیٰ میں جاری کشیدگی کے باعث تیل کی قیمتوں میں اضافے کے تناظر میں ملک کی معروف شوبز اور اسپورٹس شخصیات نے عوام سے ایندھن کے محتاط استعمال کی اپیل کر دی ہے۔
رپورٹس کے مطابق بشریٰ انصاری، شاہد آفریدی سمیت کئی نمایاں شخصیات نے خصوصی پیغامات میں شہریوں کو غیر ضروری ایندھن کے استعمال سے گریز کا مشورہ دیا۔
ان شخصیات نے حکومتی اقدامات کو سراہتے ہوئے کہا کہ مشکل حالات میں پٹرولیم مصنوعات کی فراہمی یقینی بنانا اہم پیشرفت ہے، تاہم عوامی تعاون بھی ناگزیر ہے۔
انہوں نے زور دیا کہ شہری غیر ضروری سفر کم کریں، گاڑیوں کا مشترکہ استعمال کریں اور رائیڈ شیئرنگ کو فروغ دیں تاکہ ایندھن کی بچت ممکن ہو سکے۔
پیغامات میں کہا گیا کہ روزمرہ معمولات میں معمولی تبدیلیاں بھی مجموعی طور پر بڑے مثبت اثرات ڈال سکتی ہیں اور ملک پر پڑنے والا دباؤ کم کر سکتی ہیں۔
شوبز اور اسپورٹس شخصیات کے مطابق موجودہ صورتحال قومی یکجہتی کا تقاضا کرتی ہے، جہاں ہر فرد کو ذمہ داری کا مظاہرہ کرنا ہوگا۔
انہوں نے کہا کہ ان پیغامات کا مقصد صرف آگاہی نہیں بلکہ عوام میں شعور اور تعاون کو فروغ دینا ہے تاکہ مشکل حالات کا اجتماعی طور پر مقابلہ کیا جا سکے۔
دیکھئیے:زین ملک کا نصرت فتح علی خان کو خراجِ تحسین، نئے البم میں ایک گانے کا نام بھی نصرت رکھ دیا
