اسلام آباد: وزیراعظم شہباز شریف نے سعودی ولی عہد محمد بن سلمان کو یقین دہانی کرائی ہے کہ پاکستان کی حکومت اور عوام ہر مشکل وقت میں سعودی عرب کے ساتھ شانہ بشانہ کھڑے رہیں گے، جبکہ الجبیل آئل فسیلیٹی پر حملے کی شدید مذمت بھی کی گئی ہے۔
وزیراعظم اور سعودی ولی عہد کے درمیان ٹیلیفونک رابطہ ہوا جس میں خطے میں جاری کشیدگی اور سکیورٹی صورتحال پر تفصیلی تبادلہ خیال کیا گیا۔
اعلامیے کے مطابق وزیراعظم نے حالیہ حملوں کے تناظر میں سعودی عرب کے ساتھ پاکستان کی غیر متزلزل یکجہتی کا اظہار کرتے ہوئے کہا کہ پاکستان سعودی قیادت اور عوام کے ساتھ اسی طرح کھڑا رہے گا جیسے سعودی عرب نے ہر مشکل وقت میں پاکستان کا ساتھ دیا۔
وزیراعظم شہباز شریف نے سعودی عرب کے الجبیل آئل فسیلیٹی پر حملے کی شدید مذمت کرتے ہوئے اسے خطے کے امن کیلئے خطرہ قرار دیا۔
انہوں نے موجودہ کشیدہ صورتحال میں سعودی قیادت کے تحمل اور دانشمندانہ طرز عمل کو سراہتے ہوئے کہا کہ یہی رویہ سفارتی حل کی راہ ہموار کر رہا ہے۔
وزیراعظم نے سعودی ولی عہد کو آگاہ کیا کہ پاکستان دیگر ممالک کے ساتھ مل کر کشیدگی کم کرنے اور امن کی کوششوں کو کامیاب بنانے کیلئے فعال کردار ادا کر رہا ہے۔
اعلامیے کے مطابق سعودی ولی عہد محمد بن سلمان نے بھی خطے میں امن و استحکام کے لیے پاکستان کی سفارتی کوششوں کو سراہا اور باہمی رابطے جاری رکھنے پر اتفاق کیا۔
دیکھئیے:ایران پر حملوں کی ڈیڈ لائن قریب: پاکستان اور مصر متحرک؛ جنگ بندی کیلئے سفارتی کوششیں تیز کر دیں