اسلام آباد: دفترِ خارجہ نے مسجد اقصیٰ میں اسرائیلی افواج کی دراندازی کی شدید مذمت کرتے ہوئے اسے بین الاقوامی قوانین اور اقوام متحدہ کی قراردادوں کی کھلی خلاف ورزی قرار دیا ہے۔
ترجمان دفترِ خارجہ کی جانب سے جاری بیان میں کہا گیا کہ مسجد اقصیٰ پر حملہ نہ صرف مذہبی تقدس کی پامالی ہے بلکہ خطے میں کشیدگی کو مزید بڑھانے کا باعث بھی بن سکتا ہے۔
بیان میں عالمی برادری پر زور دیا گیا کہ وہ ایسے اشتعال انگیز اقدامات کو روکنے کیلئے فوری اور مؤثر کردار ادا کرے۔
دفترِ خارجہ نے فلسطینی عوام کے حقِ خود ارادیت کی غیر متزلزل حمایت کا اعادہ کرتے ہوئے کہا کہ پاکستان ایک آزاد فلسطینی ریاست کے قیام کا حامی ہے، جس کا دارالحکومت القدس الشریف ہو۔
حکام کے مطابق پاکستان فلسطین کے مسئلے کے منصفانہ اور دیرپا حل کیلئے اپنے اصولی مؤقف پر قائم ہے اور ہر سطح پر فلسطینی عوام کی حمایت جاری رکھے گا۔