اسلام آباد: سوشل میڈیا پر بھارتی اکاؤنٹس کی جانب سے پاکستانی فضائیہ کی سرگرمیوں سے متعلق گمراہ کن اور غیر مصدقہ دعوے پھیلائے جانے کا انکشاف ہوا ہے، جنہیں حکام اور ذرائع نے بے بنیاد قرار دیا ہے۔
رپورٹس کے مطابق چند بھارتی سوشل میڈیا اکاؤنٹس نے دعویٰ کیا کہ پاکستان ایئر فورس کے سی-130 اور آئی ایل-78 طیارے سعودی عرب کے کنگ عبدالعزیز ایئر بیس کی جانب روانہ ہوئے اور خطے میں کسی ممکنہ عسکری سرگرمی کا حصہ ہیں۔
ان پوسٹس میں یہ تاثر دینے کی کوشش کی گئی کہ پاکستان اور سعودی عرب کے درمیان دفاعی معاہدہ متحرک ہو چکا ہے، جبکہ بعض دعوؤں میں کہا گیا کہ پاکستانی فضائیہ کے ٹینکر طیارے خلیجی فضائی حدود میں لڑاکا طیاروں کی معاونت کر رہے ہیں۔
تاہم ذرائع کے مطابق یہ دعوے غیر مصدقہ اور گمراہ کن ہیں اور ان کی کسی سرکاری یا معتبر ذریعے سے تصدیق سامنے نہیں آئی۔
حکام کا کہنا ہے کہ اس نوعیت کی خبریں سوشل میڈیا پر پروپیگنڈا مہم کا حصہ ہو سکتی ہیں جن کا مقصد پاکستان کے حوالے سے غلط تاثر قائم کرنا ہے۔
دفاعی تجزیہ کاروں کے مطابق حالیہ دنوں میں خطے کی صورتحال کے تناظر میں سوشل میڈیا پر جعلی یا مبالغہ آمیز معلومات پھیلانے کے واقعات میں اضافہ دیکھا گیا ہے، جس میں مخصوص اکاؤنٹس سرگرم ہیں۔
واضح رہے کہ اس سے قبل بھی بھارتی سوشل میڈیا اکاؤنٹس کی جانب سے پاکستان کے دفاعی معاملات سے متعلق غیر مصدقہ اور گمراہ کن معلومات پھیلانے کے واقعات رپورٹ ہوتے رہے ہیں۔
دیکھئیے:سعودی اور ایرانی وزرائے خارجہ کا جنگ بندی کے بعد پہلا سرکاری رابطہ، کشیدگی کم کرنے پر زور
