عابدجان: پاکستان ویمن فٹبال ٹیم نے فیفا سیریز میں ترکس اینڈ کیکوس آئی لینڈز کو 0-8 سے شکست دے کر انٹرنیشنل سطح پر اپنی سب سے بڑی فتح حاصل کرلی۔
آئیوری کوسٹ کے شہر عابدجان میں کھیلے گئے میچ میں پاکستان ویمن ٹیم نے ابتدا ہی سے حریف ٹیم پر دباؤ برقرار رکھا اور پہلے ہاف کے اختتام تک چار صفر کی برتری حاصل کرلی۔
قومی ٹیم کی جانب سے پہلے ہاف میں زہمینہ ملک، اقصیٰ مشتاق، لیلیٰ بنارس اور مریم محمود نے گول اسکور کیے، جس سے ٹیم کو مضبوط برتری حاصل ہوئی۔
دوسرے ہاف میں بھی پاکستانی کھلاڑیوں نے جارحانہ کھیل جاری رکھا، لیلیٰ بنارس اور اقصیٰ مشتاق نے مزید ایک، ایک گول کیا جبکہ نادیہ خان اور اسریٰ خان نے بھی گیند جال میں پہنچا کر برتری کو آٹھ صفر تک بڑھا دیا۔
حکام کے مطابق یہ پاکستان ویمن ٹیم کی انٹرنیشنل فٹبال میں سب سے بڑے مارجن سے فتح ہے، اس سے قبل قومی ٹیم نے مالدیپ کو 0-7 سے شکست دی تھی۔
یہ کامیابی فیفا سیریز میں پاکستان ویمن ٹیم کی مضبوط کارکردگی کا مظہر قرار دی جا رہی ہے اور آئندہ میچز کیلئے ٹیم کے حوصلے بلند ہوئے ہیں۔
