رمشا خان نے خوشال خان سے شادی کی تصدیق کر دی، تصاویر لیک ہونے پر شدید ردعمل

کراچی: پاکستانی اداکارہ رمشا خان نے ساتھی اداکار خوشال خان سے شادی کی باضابطہ تصدیق کرتے ہوئے وائرل ہونے والی نجی تصاویر پر سخت ردعمل دیا ہے۔ اداکارہ نے یہ بیان حالیہ دنوں میں گردش کرنے والی افواہوں کے بعد سوشل میڈیا پر جاری کیا۔

رمشا خان نے انسٹاگرام اسٹوری میں کہا کہ ان کی اور خوشال خان کی نجی تصاویر بغیر اجازت لیک کی گئیں، جو اخلاقی طور پر درست نہیں۔ انہوں نے سوشل میڈیا پیجز کو خبردار کیا کہ ان تصاویر کو بطور مواد استعمال نہ کیا جائے اور فوری طور پر ہٹا دیا جائے۔

اداکارہ کا کہنا تھا کہ وہ ہمیشہ اپنی ذاتی زندگی کو نجی رکھتی آئی ہیں اور آئندہ بھی ایسا ہی کریں گی۔ انہوں نے مداحوں سے درخواست کی کہ ان کی پرائیویسی کا احترام کیا جائے اور وائرل مواد کو مزید شیئر نہ کیا جائے۔

رمشا خان نے شادی کی تصدیق کرتے ہوئے کہا کہ وہ زندگی کے نئے مرحلے میں داخل ہو رہی ہیں، تاہم اس حوالے سے مزید تفصیلات مناسب وقت پر شیئر کی جائیں گی۔ ان کے مطابق “یہ ہماری زندگی ہے، کوئی سرخی نہیں”، اس لیے انہیں تنہا چھوڑ دیا جائے۔

یاد رہے کہ گزشتہ چند روز سے دونوں اداکاروں کی شادی سے متعلق افواہیں زیر گردش تھیں، جبکہ بعض شوبز شخصیات کی جانب سے بھی غیر رسمی تصدیق سامنے آئی تھی، جس کے بعد وائرل تصاویر نے اس بحث کو مزید تیز کر دیا۔

دیکھئیے:لیجنڈری گلوکارہ آشا بھوسلے انتقال کر گئیں: 92 برس کی عمر میں مداحوں کو سوگوار چھوڑ گئیں