بھارت کی لیجنڈری گلوکارہ آشا بھوسلے 92 برس کی عمر میں انتقال کر گئیں۔ بھارتی میڈیا کے مطابق انہیں طبیعت ناساز ہونے پر ممبئی کے بریچ کینڈی اسپتال میں داخل کرایا گیا تھا، جہاں وہ جانبر نہ ہو سکیں۔
رپورٹس کے مطابق آشا بھوسلے کو سینے کے انفیکشن کے باعث اسپتال لایا گیا تھا اور ان کا انتقال متعدد اعضا کے کام چھوڑ جانے کے سبب ہوا۔ ان کی پوتی زنائی بھوسلے نے بھی سوشل میڈیا پر ان کی علالت کی تصدیق کی تھی۔
لیجنڈری گلوکارہ کے بیٹے آنند بھوسلے کے مطابق عوام کل صبح 11 بجے لوئر پریل میں واقع ان کی رہائش گاہ پر آخری دیدار کر سکیں گے، جبکہ آخری رسومات شام 4 بجے شیواجی پارک میں ادا کی جائیں گی۔
آشا بھوسلے نے کئی دہائیوں پر محیط کیریئر میں بالی وڈ سمیت مختلف زبانوں میں بے شمار مقبول گیت گائے اور موسیقی کی دنیا میں ایک منفرد مقام حاصل کیا۔ انہیں سن 2000 میں دادا صاحب پھالکے ایوارڈ اور 2008 میں پدم وبھوشن جیسے اعلیٰ اعزازات سے بھی نوازا گیا تھا۔
ان کے انتقال پر مداحوں اور شوبز شخصیات کی جانب سے گہرے رنج و غم کا اظہار کیا جا رہا ہے، جبکہ بھارتی موسیقی کی تاریخ میں ان کی خدمات کو ہمیشہ یاد رکھا جائے گا۔
