کراچی: پاکستان سپر لیگ (پی ایس ایل) 11 میں پشاور زلمی نے ملتان سلطانز کو 24 رنز سے شکست دے کر ایونٹ میں اپنی پانچویں کامیابی حاصل کرلی اور پوائنٹس ٹیبل پر پہلی پوزیشن برقرار رکھی۔ میچ نیشنل اسٹیڈیم کراچی میں کھیلا گیا۔
ملتان سلطانز نے ٹاس جیت کر پہلے فیلڈنگ کا فیصلہ کیا، جس پر پشاور زلمی نے مقررہ 20 اوورز میں 6 وکٹوں کے نقصان پر 196 رنز بنائے۔ کوشل مینڈس 68 اور محمد حارث 38 رنز کے ساتھ نمایاں رہے، جبکہ فرحان یوسف نے 30 رنز کی اننگز کھیلی۔ ملتان کی جانب سے محمد اسماعیل اور پیٹر سڈل نے 2، 2 وکٹیں حاصل کیں۔
197 رنز کے تعاقب میں ملتان سلطانز کی ٹیم مقررہ اوورز میں 8 وکٹوں کے نقصان پر 172 رنز ہی بنا سکی۔ شان مسعود 35 اور جوش فلپس 32 رنز کے ساتھ نمایاں رہے، تاہم ٹیم ہدف تک نہ پہنچ سکی۔
پشاور زلمی کی جانب سے سفیان مقیم نے 3 جبکہ افتخار احمد اور ناہید رانا نے 2، 2 کھلاڑیوں کو آؤٹ کیا، جس کے باعث ملتان کی بیٹنگ لائن دباؤ میں رہی۔
اس کامیابی کے ساتھ پشاور زلمی 6 میچز میں 5 فتوحات اور ایک میچ بارش کی نذر ہونے کے بعد 11 پوائنٹس کے ساتھ سرفہرست ہے، جبکہ ملتان سلطانز 8 پوائنٹس کے ساتھ دوسرے نمبر پر موجود ہے۔
دیکھئیے:پی ایس ایل 11: حیدرآباد کنگز مین کی ایک اور فتح، اسلام آباد یونائیٹڈ کو 6 وکٹوں سے شکست