لاہور: پاکستان سپر لیگ (پی ایس ایل) کے گیارہویں ایڈیشن میں پشاور زلمی کے کپتان بابر اعظم کی شاندار فارم میں واپسی کے بعد ان کی نظر اتارنے کی ویڈیو سوشل میڈیا پر وائرل ہو گئی۔
تفصیلات کے مطابق بابر اعظم نے کوئٹہ گلیڈی ایٹرز کے خلاف میچ میں 71 رنز کی ناقابل شکست اننگز کھیل کر ٹیم کی فتح میں اہم کردار ادا کیا۔ ان کی کارکردگی کو شائقین اور کرکٹ حلقوں کی جانب سے خوب سراہا جا رہا ہے۔
میچ کے بعد پاکستان سپر لیگ کے چیف ایگزیکٹو آفیسر سلمان نصیر کی ایک ویڈیو سامنے آئی، جس میں وہ بابر اعظم کی نظر اتارتے دکھائی دے رہے ہیں۔ یہ ویڈیو سوشل میڈیا پر تیزی سے وائرل ہو رہی ہے اور صارفین کی جانب سے دلچسپ تبصرے کیے جا رہے ہیں۔
واضح رہے کہ بابر اعظم گزشتہ چند برسوں سے فارم میں کمی کے باعث تنقید کا سامنا کر رہے تھے، تاہم رواں پی ایس ایل میں انہوں نے اپنی کارکردگی سے ناقدین کو جواب دیا ہے۔
اعداد و شمار کے مطابق بابر اعظم اب تک 301 رنز کے ساتھ ایونٹ کے ٹاپ اسکوررز کی فہرست میں دوسرے نمبر پر موجود ہیں، جبکہ ان کی حالیہ اننگز کو ان کی فارم میں واپسی کا اہم اشارہ قرار دیا جا رہا ہے۔
دیکھئیے:شان مسعود ٹیسٹ کپتان برقرار، سرفراز احمد کو ہیڈ کوچ بنانے کا فیصلہ، این سی اے میں ریڈ بال کیمپ جاری