ڈی جی آئی ایس پی آر نے شفاء تعمیر ملت یونیورسٹی اسلام آباد کا دورہ کیا، جہاں انہوں نے اساتذہ، فیکلٹی ممبران اور طلبہ کے ساتھ ایک خصوصی نشست میں شرکت کی۔ یونیورسٹی آمد پر شرکاء نے ڈی جی آئی ایس پی آر کا پرتپاک استقبال کیا۔ اس نشست کا مقصد نوجوان نسل کو قومی سلامتی کے چیلنجز اور عصری خطرات سے آگاہ کرنا تھا۔
قومی سلامتی پر تبادلہ خیال
تقریب کے دوران ڈی جی آئی ایس پی آر نے قومی سلامتی کے امور، بشمول انسداد دہشت گردی اور انفارمیشن وارفیئر پر تفصیلی گفتگو کی۔ انہوں نے طلبہ کی جانب سے پوچھے گئے مختلف سوالات کے مدلل جوابات دیے۔ ڈی جی آئی ایس پی آر نے زور دیا کہ موجودہ دور میں ہائبرڈ وارفیئر اور منفی پروپیگنڈے کا مقابلہ کرنے کے لیے نوجوانوں کا باخبر رہنا انتہائی ضروری ہے۔
سوشل میڈیا کا استعمال
نشست کے شرکاء نے ڈی جی آئی ایس پی آر کی گفتگو کو سراہتے ہوئے کہا کہ اس سیشن سے سوشل میڈیا کے ذمہ دارانہ استعمال کے حوالے سے جامع آگاہی حاصل ہوئی اور کئی ابہام دور ہوئے۔ شرکاء کا کہنا تھا کہ جعلی خبروں اور منفی پروپیگنڈے کے خطرات کے پیش نظر کسی بھی معلومات کو شیئر کرنے سے قبل مستند ذرائع سے اس کی تصدیق ناگزیر ہے۔ اس موقع پر معرکہ حق کی تاریخی فتح کا تذکرہ کرتے ہوئے کہا گیا کہ اس نے پاکستان کے عالمی تشخص کو مزید مستحکم کیا ہے۔
افواجِ سے یکجہتی کا اظہار
اساتذہ اور طلبہ نے دفاعِ وطن کے لیے افواجِ پاکستان کی لازوال قربانیوں کو خراجِ عقیدت پیش کیا اور مسلح افواج کے ساتھ یکجہتی کے غیر متزلزل عزم کا اعادہ کیا۔ وائس چانسلر ڈاکٹر محمد اقبال خان نے خطاب کرتے ہوئے کہا کہ نوجوان نسل کو ملک کے استحکام اور سلامتی کے لیے اپنا مثبت کردار ادا کرنا چاہیے۔ بالخصوص وزیرستان سے تعلق رکھنے والے طلبہ نے اس نشست کو ایک مؤثر پیشرفت قرار دیتے ہوئے اسے بھرپور طریقے سے سراہا۔
