بھارتی فوج کے آرمی چیف جنرل اپیندر ددویدی نے پاکستان کو براہِ راست نشانہ بناتے ہوئے ایک انتہائی متنازع، غیر ذمہ دارانہ اور دھمکی آمیز بیان جاری کیا ہے۔ بھارتی میڈیا پر سامنے آنے والے اس بیانیے میں ان کا کہنا تھا کہ پاکستان کو اب خود یہ فیصلہ کرنا ہوگا کہ وہ دنیا کے جغرافیے کا حصہ رہنا چاہتا ہے یا تاریخ کا۔ بھارتی آرمی چیف کے اس مضحکہ خیز بیان کا اسکرین شاٹ سامنے آتے ہی سوشل میڈیا اور بین الاقوامی دفاعی حلقوں میں شدید ردِعمل دیکھنے میں آ رہا ہے۔
پاکستانی حلقے
پاکستانی عوامی، سماجی اور دفاعی حلقوں کی جانب سے بھارتی آرمی چیف کے اس بیان کو روایتی بھارتی ‘گیدڑ بھبکی’ قرار دیتے ہوئے سخت اور دندان شکن جواب دیا جا رہا ہے۔ دفاعی ماہرین کا کہنا ہے کہ بھارتی سینیئر کمانڈر کا یہ اکھڑ پن اور غیر پیشہ ورانہ طرزِ گفتگو دراصل ان کی اندرونی بوکھلاہٹ اور خطے میں بھارتی بالادستی قائم کرنے میں ناکامی کا واضح اعتراف ہے۔
ماضی کی عبرت ناک شکست
سوشل میڈیا پر پاکستانی صارفین اور سکیورٹی مبصرین نے بھارتی آرمی چیف کو آڑے ہاتھوں لیتے ہوئے واضح کیا ہے کہ لگتا ہے نئی دہلی کے حکام ماضی کے معرکہِ حق اور 2019 کی فضائی جھڑپوں کو بھول چکے ہیں، جہاں ناصرف بھارتی فضائیہ کے طیارے مار گرائے گئے بلکہ ان کا پائلٹ بھی گرفتار ہوا اور بھارتی افواج کو عالمی سطح پر عبرت ناک سبکی کا سامنا کرنا پڑا تھا۔
سخت ترین جواب کا عزم
پاکستانی حلقوں کی جانب سے نئی دہلی کو دوٹوک پیغام دیتے ہوئے واضح کیا جا رہا ہے کہ اگر بھارت نے اندرونی سیاسی مقاصد یا انتخابات کی آڑ میں دوبارہ سرحد پار کسی مہم جوئی، مس ایڈونچر یا جارحیت کی حماقت کی، تو پاک فوج اور 22 کروڑ غیور پاکستانی عوام کی جانب سے اسے ایک بار پھر پہلے سے بھی زیادہ سخت، دندان شکن اور ناقابلِ فراموش سرپرائز دیا جائے گا۔