کراچی: مرکزی رویت ہلال کمیٹی کے چیئرمین مولانا عبدالخبیر آزاد نے ملک بھر میں ذی الحج کا چاند نظر آنے کا باضابطہ اعلان کر دیا ہے، جس کے تحت پاکستان میں عید الاضحیٰ بدھ 27 مئی 2026 کو مذہبی عقیدت و احترام کے ساتھ منائی جائے گی۔
ذی الحج کا چاند دیکھنے کے لیے مرکزی رویت ہلال کمیٹی کا اہم اجلاس کراچی میں منعقد ہوا، جس کی صدارت چیئرمین مولانا عبدالخبیر آزاد نے کی۔ اجلاس میں مرکزی و زونل رویت ہلال کمیٹی کے ارکان سمیت محکمہ موسمیات اور سپارکو کے ماہرین نے بھی شرکت کی تاکہ سائنسی اور فنی معاونت حاصل کی جا سکے۔ اس کے ساتھ ہی وفاقی دارالحکومت اسلام آباد اور تمام صوبائی دارالحکومتوں میں زونل کمیٹیوں کے اجلاس بھی بیک وقت منعقد کیے گئے۔
اجلاس کے بعد پریس کانفرنس سے خطاب کرتے ہوئے چیئرمین مولانا عبدالخبیر آزاد نے بتایا کہ ملک کے مختلف حصوں سے چاند نظر آنے کی ٹھوس شہادتیں موصول ہوئیں، جس کے بعد اتفاقِ رائے سے چاند کی رویت کا اعلان کیا گیا۔ انہوں نے واضح کیا کہ پیر ۱۸ مئی 2026 کو ملک بھر میں یکم ذی الحج ہوگی اور اس حساب سے ۱۰ ذی الحج یعنی عید الاضحیٰ 27 مئی بروز بدھ کو ہوگی۔
ذرائع کے مطابق، کراچی میں جاری مرکزی اجلاس کے دوران کمیٹی کے ۲ ارکان کی جانب سے چاند دیکھنے کی براہِ راست شہادتیں ملیں۔ اس کے علاوہ صوبہ خیبر پختونخوا سے بھی 3 معتبر شہادتیں موصول ہوئیں، جہاں زونل کمیٹی کے ارکان کے مطابق مردان سے دو گواہان محمد اور احمد نے چاند کی گواہی دی جبکہ پشاور سے بھی ایک گواہ کی جانب سے ذی الحج کا چاند نظر آنے کی تصدیق کی گئی۔
دیکھئیے:پانی کا بحران یا جنگی ہتھیار؟ بھارت کی آبی پالیسی اور عالمی برادری کی خاموشی باعثِ تشویش
