بلوچستان کے علاقے منگلہ زرغون غر میں سکیورٹی فورسز نے دہشت گردوں کے خلاف ایک انتہائی کامیاب اور بڑا انٹیلی جنس بیسڈ آپریشن مکمل کیا ہے، جس کے دوران کالعدم تنظیم ‘فتنہ الہندوستان’ سے تعلق رکھنے والے 35 سے زائد عسکریت پسند مارے گئے ہیں جبکہ 3 اہم کمانڈرز کو گرفتار کر لیا گیا ہے۔
وزیراعلیٰ بلوچستان کے معاون برائے سیاسی و میڈیا امور شاہد رند نے اس آپریشن کی تفاصیل فراہم کرتے ہوئے بتایا کہ منگلہ زرغون غر کے علاقے میں سکیورٹی فورسز کی جانب سے یہ کاروائی گزشتہ 13 مئی سے مسلسل جاری تھی۔ انٹیلی جنس معلومات پر مبنی اس طویل آپریشن کے دوران فورسز نے دہشت گردوں کے مضبوط گڑھ کو نشانہ بنایا، جس کے نتیجے میں فتنہ ہندوستان کے 35 سے زائد شرپسند ہلاک ہوئے۔
شاہد رند کے مطابق سکیورٹی فورسز کی اس مؤثر کاروائی کے دوران عسکریت پسندوں کے متعدد خفیہ کیمپس اور ٹھکانے بھی مکمل طور پر تباہ کر دیے گئے ہیں، جس سے دہشت گرد تنظیم کے نیٹ ورک کو شدید ترین مالی و تنظیمی نقصان پہنچا ہے۔ انہوں نے مزید انکشاف کیا کہ آپریشن کے دوران فتنہ ہندوستان کے 3 اہم ترین کمانڈرز کو زندہ گرفتار کرنے میں بھی کامیابی حاصل ہوئی ہے۔
گرفتار کمانڈرز سے تفتیش کے دوران اہم ترین معلومات حاصل ہوئی ہیں، جن کی بنیاد پر صوبے کے مختلف علاقوں میں مزید کارروائیاں اب بھی جاری ہیں۔
معاونِ وزیراعلیٰ کا کہنا تھا کہ دہشت گرد تنظیم کے مقامی سہولت کاروں اور انہیں پشت پناہی فراہم کرنے والے عناصر کے خلاف بھی گھیرا تنگ کیا جا رہا ہے۔ ریاستِ پاکستان ملک اور صوبے میں امن و امان کے مکمل خاتمے اور دہشت گردی کی جڑیں اکھاڑنے تک اپنی کارروائیاں بلاتعطل جاری رکھے گی۔
انہوں نے اس کامیاب آپریشن کو بلوچستان اور پورے ملک کے امن و استحکام کے لیے ناگزیر قرار دیتے ہوئے عوام سے اپیل کی کہ وہ سیکیورٹی فورسز کے ساتھ مکمل تعاون کریں اور اپنے اردگرد کسی بھی مشکوک سرگرمی یا عنصر کی فوری نشاندہی کریں۔
