مشرقِ وسطیٰ میں بڑھتی ہوئی کشیدگی کے دوران سعودی عرب کی فضائی حدود کی خلاف ورزی کی سنگین کوشش سامنے آئی ہے، جہاں عراقی سرحد کی جانب سے مملکت میں داخل ہونے والے 3 مسلح ڈرونز کو سعودی دفاعی نظام نے فضا میں ہی تباہ کر دیا۔
سعودی وزارتِ دفاع کی جانب سے جاری کردہ باقاعدہ اعلامیے کے مطابق عراق کی سمت سے مملکت کی فضائی حدود میں داخل ہونے والے 3 مشکوک ڈرونز کا بروقت سراغ لگایا گیا۔ سعودی ایئر ڈیفنس فورسز نے فوری اور مؤثر جوابی کارروائی کرتے ہوئے ان تینوں ڈرونز کو ہدف تک پہنچنے سے قبل ہی فضا میں مار گرایا۔ وزارتِ دفاع نے اس جارحیت پر سخت ردِعمل کا اظہار کرتے ہوئے واضح کیا ہے کہ سعودی عرب اپنی خودمختاری اور علاقائی سلامتی کے تحفظ کے لیے مناسب وقت اور جگہ پر اس کارروائی کا جواب دینے کا پورا حق محفوظ رکھتا ہے۔
دوسری جانب سعودی عرب نے متحدہ عرب امارات کے جوہری پلانٹ کے قریب ہونے والے حالیہ ڈرون حملے کی بھی شدید الفاظ میں مذمت کی ہے۔ سعودی وزارتِ خارجہ کی طرف سے جاری بیان میں کہا گیا ہے کہ متحدہ عرب امارات کی اہم تنصیبات کو نشانہ بنانے کی یہ کوششیں خطے کے امن و استحکام کے لیے شدید خطرہ ہیں، اور اس قسم کی حماقتیں پورے خطے کی سیکیورٹی کو داؤ پر لگا رہی ہیں۔ سعودی عرب برادر ملک یو اے ای کی سیکیورٹی اور دفاع کے لیے اس کے ساتھ مضبوطی سے کھڑا ہے۔
طیاروں اور ڈرونز کے حالیہ حملوں کے بعد سعودی عرب سمیت خلیجی ممالک میں دفاعی نظام کو ہائی الرٹ کر دیا گیا ہے، اور سرحدی نگرانی کے نظام کو مزید سخت بناتے ہوئے خطے کی صورتحال پر گہری نظر رکھی جا رہی ہے۔