سلہٹ: بنگلہ دیش اور پاکستان کے درمیان کھیلے جا رہے دوسرے اور آخری ٹیسٹ میچ کے تیسرے روز میزبان ٹیم اپنی دوسری اننگز میں 390 رنز بنا کر آل آؤٹ ہو گئی ہے، جس کے بعد پاکستان کو میچ اور سیریز بچانے کے لیے 437 رنز کا انتہائی مشکل ہدف ملا ہے۔ دو ٹیسٹ میچوں کی سیریز میں بنگلہ دیش کو پہلے ہی 1-0 کی برتری حاصل ہے، جہاں اس نے پہلے میچ میں پاکستان کو 104 رنز سے شکست دی تھی۔
میچ کے تیسرے روز بنگلہ دیش نے اپنی دوسری اننگز 110 رنز 3 کھلاڑی آؤٹ سے آگے بڑھائی۔ تجربہ کار بلے باز مشفق الرحیم نے شاندار بیٹنگ کا مظاہرہ کرتے ہوئے 137 رنز کی اننگز کھیلی، جبکہ لٹن داس نے 69 رنز بنا کر اپنی ٹیم کی پوزیشن کو مزید مستحکم کیا۔
اس سے قبل محمود الحسن جوئے 52 اور مومن الحق 30 رنز بنا کر آؤٹ ہوئے تھے۔ پاکستان کی جانب سے خرم شہزاد نے بہترین باؤلنگ کرتے ہوئے 4 کھلاڑیوں کو آؤٹ کیا، ساجد خان نے 3 اور حسن علی نے 2 وکٹیں حاصل کیں۔
اس سے قبل میچ کے دوسرے روز پاکستان کی پہلی اننگز بنگلہ دیش کے 278 رنز کے جواب میں محض 232 رنز پر سمٹ گئی تھی۔ پاکستان کی جانب سے بابر اعظم 68 اور ساجد خان 38 رنز بنا کر نمایاں رہے تھے، جبکہ کپتان شان مسعود 21، سلمان آغا 21 اور محمد رضوان صرف 13 رنز بنا سکے تھے۔
بنگلہ دیش کی طرف سے ناہید رانا اور تیج الاسلام نے 3، 3 وکٹیں حاصل کی تھیں۔ اب پاکستان کو سیریز برابر کرنے کے لیے اپنی دوسری اننگز میں تاریخ کی سب سے بڑی بیٹنگ لائن اپ کا مظاہرہ کرتے ہوئے 437 رنز کا ہدف عبور کرنا ہوگا۔
دیکھئیے:سلہٹ ٹیسٹ کا دوسرا روز؛ بنگلادیش کے 278 رنز کے جواب میں پاکستان کی بیٹنگ لائن شدید مشکلات کا شکار