سلہٹ: پاکستان اور بنگلادیش کے درمیان سلہٹ میں کھیلے جا رہے دوسرے ٹیسٹ میچ کے دوسرے روز پاکستان کی پہلی اننگز میں بیٹنگ جاری ہے، تاہم بنگلادیشی باؤلرز نے نپی تلی باؤلنگ کا مظاہرہ کرتے ہوئے پاکستانی ٹاپ آرڈر کو شدید مشکلات سے دوچار کر دیا ہے۔
دوسرے روز کھیل کا آغاز ہوا تو پاکستان نے اپنی پہلی اننگز 21 رنز بغیر کسی نقصان کے آگے بڑھائی۔ تاہم، گزشتہ روز کریز پر جمنے والے دونوں اوپنرز دوسرے روز جلد ہی پویلین لوٹ گئے۔ اذان اویس 13 اور عبداللہ فضل محض 9 رنز بنا کر آؤٹ ہوئے۔ اس کے بعد کپتان شان مسعود اور سعود شکیل نے ٹیم کو سنبھالنے کی کوشش کی لیکن وہ بھی ناکام رہے؛ شان مسعود 21 رنز جبکہ سعود شکیل صرف 8 رنز بنا کر آؤٹ ہوئے، جس کے باعث پاکستان کی چوتھی وکٹ 79 رنز پر گر گئی۔
اس سے قبل، میچ کے پہلے روز بنگلادیش کی ٹیم اپنی پہلی اننگز میں 278 رنز بنا کر آل آؤٹ ہو گئی تھی۔ بنگلادیش کی جانب سے وکٹ کیپر بیٹر لٹن داس نے شاندار بیٹنگ کا مظاہرہ کرتے ہوئے 126 رنز کی اننگز کھیلی۔ پاکستان کی طرف سے خرم شہزاد سب سے کامیاب باؤلر رہے جنہوں نے 4 وکٹیں حاصل کیں، جبکہ محمد عباس نے 3، حسن علی نے 2 اور ساجد خان نے ایک کھلاڑی کو آؤٹ کیا۔
یاد رہے کہ اس میچ میں پاکستان کے کپتان شان مسعود نے ٹاس جیت کر بنگلادیش کو پہلے بیٹنگ کی دعوت دی تھی۔ دو ٹیسٹ میچوں کی اس سیریز میں ہوم ٹیم بنگلادیش کو ایک صفر کی برتری حاصل ہے، جہاں انہوں نے پہلے ٹیسٹ میچ میں پاکستان کو 104 رنز سے شکست دی تھی۔
دیکھئیے:پاکستان میں طویل عرصے بعد انٹرنیشنل ہاکی کی بحالی کی کوششیں؛ کوریا کو سیریز کھیلنے کی دعوت