ایک انتہائی اہم اور بڑی سفارتی پیش رفت میں فیلڈ مارشل نے امریکہ اور ایران کو ایک تاریخی امن فریم ورک پر متفق کرنے میں کامیابی حاصل کر لی ہے۔ ذرائع کے مطابق فیلڈ مارشل سید عاصم منیر کی انتھک کوششوں کے نتیجے میں دونوں فریقین ایک دوسرے کے لیے گنجائش پیدا کرنے اور خطے میں پائیدار امن کے قیام کے لیے ایک مشترکہ فریم ورک پر آمادہ ہو گئے ہیں، جسے عالمی منظر نامے پر ایک بڑی کامیابی تصور کیا جا رہا ہے۔
تفصیلات کے مطابق فیلڈ مارشل کے دورہِ ایران اور وہاں قیام کے دوران امریکی قیادت کے ساتھ انتہائی اہم اور حساس نوعیت کے رابطے جاری رہے۔
اس دوران امریکی نائب صدر جے ڈی وینس اور ممتاز سفارت کار اسٹیو وٹکوف، فیلڈ مارشل کے ساتھ مسلسل رابطے میں رہے اور مذاکرات کے عمل کو آگے بڑھانے میں کلیدی کردار ادا کیا۔ ان سفارتی کوششوں کے نتیجے میں اب امریکہ اور ایران دونوں ہی اس امن فریم ورک کی توثیق کر چکے ہیں۔
ذرائع کا کہنا ہے کہ اس تاریخی امن معاہدے اور فریم ورک کا باضابطہ اعلان کل متوقع ہے، جس کے بعد خطے میں طویل عرصے سے جاری کشیدگی کے خاتمے اور سفارتی تعلقات کے ایک نئے دور کا آغاز ہونے کی امید ظاہر کی جا رہی ہے۔
