اسلام آباد: برطانیہ نے خطے میں امن و استحکام کے لیے پاکستان کی سفارتی کوششوں کو سراہتے ہوئے امریکہ اور ایران کے درمیان ہونے والی اسلام آباد مفاہمتی یادداشت میں پاکستان کے کردار کو انتہائی قابلِ قدر قرار دیا ہے۔
یہ بات برطانوی وزیر خارجہ ایوویٹ کوپر نے نائب وزیراعظم اور وزیر خارجہ محمد اسحاق ڈار کے ساتھ ٹیلیفون پر بات چیت کرتے ہوئے کہی۔
ترجمان دفترِ خارجہ کی جانب سے جاری کردہ اعلامیے کے مطابق، دونوں رہنماؤں کے درمیان ٹیلیفونک رابطے میں باہمی دلچسپی کے امور اور علاقائی سکیورٹی کی صورتحال پر تفصیلی تبادلہ خیال کیا گیا۔
اس موقع پر برطانوی وزیر خارجہ نے اعتراف کیا کہ امریکہ اور ایران کے درمیان حالیہ سفارتی کامیابی اور اسلام آباد مفاہمتی یادداشت کو حتمی شکل دینے میں پاکستان نے ایک کلیدی اور تعمیری ثالث کا کردار ادا کیا ہے۔
گفتگو کے دوران نائب وزیراعظم اور وزیر خارجہ اسحاق ڈار نے علاقائی و عالمی تنازعات کے پرامن حل کے لیے مذاکرات اور سفارت کاری کے حوالے سے پاکستان کے پختہ عزم کا اعادہ کیا۔
دونوں رہنماؤں نے پاک-برطانیہ تعلقات کو مزید فروغ دینے اور مستقبل میں بھی مختلف عالمی و علاقائی فورمز پر قریبی باہمی رابطے برقرار رکھنے پر اتفاق کیا۔