اسلام آباد: وفاقی وزیر داخلہ محسن رضا نقوی مشرقِ وسطیٰ کی تیزی سے بدلتی ہوئی صورتحال اور علاقائی امور کے تناظر میں ایک انتہائی اہم اور تزویراتی دورے پر سعودی عرب پہنچ گئے ہیں۔ سفارتی و سیاسی حلقوں کی جانب سے وزیر داخلہ کے اس دورے کو موجودہ عالمی و علاقائی حالات کے پیشِ نظر خاص اہمیت دی جا رہی ہے۔
دورے کے دوران وزیر داخلہ محسن نقوی سعودی عرب کے ہم منصب شہزادہ عبدالعزیز بن سعود بن نایف سمیت دیگر اعلٰی سعودی حکام اور اہم شخصیات سے ملاقاتیں کریں گے۔ ان ملاقاتوں کا بنیادی محور دونوں برادر ممالک کے مابین تعلقات کو مزید پائیدار بنانا اور سیکیورٹی کے شعبے میں تعاون کی نئی راہیں تلاش کرنا ہے۔
پاک سعودی وزرائے داخلہ کے مابین شیڈول باقاعدہ ملاقات میں دونوں ممالک کے درمیان مشترکہ سکیورٹی تعاون کی موجودہ صورتحال کا جائزہ لیا جائے گا اور اس کے دائرہ کار کو مزید وسیع و مضبوط بنانے کے حوالے سے ٹھوس معاملات پر بات چیت کی جائے گی۔
علاوہ ازیں، اس اہم ملاقات میں مشرقِ وسطیٰ کی مجموعی سکیورٹی صورتحال، خطے کو درپیش چیلنجز اور خصوصاً ایران امریکہ مذاکراتی معاہدے کے بعد پیدا ہونے والے نئے منظر نامے پر بھی تفصیلی تبادلہ خیال کیا جائے گا، تاکہ علاقائی استحکام کے لیے مشترکہ حکمتِ عملی کو فروغ دیا جا سکے۔
