فیلڈ مارشل سید عاصم منیر نے واضح کیا ہے کہ پاکستان کو غیر مستحکم کرنے کے لیے دشمن انٹیلی جنس ایجنسیوں کی سازشوں اور ان کے پراکسی نیٹ ورکس سے مکمل آگاہ ہیں، اور سرحد پار سے ہونے والی دہشت گردی کو ریاست پوری قوت سے کچل دے گی۔
آئی ایس پی آر کے مطابق ان خیالات کا اظہار انہوں نے نیشنل ڈیفنس یونیورسٹی (این ڈی یو) کے دورے کے موقع پر نیشنل سکیورٹی اینڈ وار کورس کے گریجویٹنگ افسران سے خطاب کرتے ہوئے کیا۔
اپنے خطاب میں فیلڈ مارشل نے بدلتی ہوئی جنگی حکمتِ عملی پر زور دیتے ہوئے کہا کہ جنگ کی نوعیت اب تبدیل ہو چکی ہے، اور پاکستان کی مسلح افواج خود کو ہائبرڈ، روایتی اور غیر روایتی خطرات سے نمٹنے کے لیے اسی مطابق ڈھال رہی ہیں۔
انہوں نے مزید کہا کہ دشمن کے نیٹ ورکس ملکی امن اور معاشی ترقی کو نقصان نہیں پہنچا سکتے، اور قوم کی حمایت سے دہشت گردوں کے ٹھکانوں اور ان کے سہولت کاروں کا مکمل خاتمہ یقینی بنایا جائے گا۔ ان کا کہنا تھا کہ جنگیں میڈیا کے شور یا سیاسی نعروں سے نہیں بلکہ ایمان، اتحاد اور نظم و ضبط سے جیتی جاتی ہیں۔
دیکھیے: بلوچستان میں دہشت گردی میں بھارت ملوث، 4 روز میں 54 دہشت گرد ہلاک: ڈی جی آئی ایس پی آر
