افغانستان کے صوبہ بدخشاں میں طالبان اور نیشنل ریزسٹنس فرنٹ (این آر ایف) کے درمیان مسلح کشیدگی میں مزید اضافہ ہو گیا ہے۔ این آر ایف نے رات گئے ایک منظم حملے میں طالبان فورسز کو نشانہ بنانے کا دعویٰ کیا ہے۔
این آر ایف کی جانب سے جاری کردہ بیان کے مطابق تنظیم کے جنگجوؤں نے بدخشاں کے ضلع راغ کے علاقے سیاب میں قائم طالبان کی ایک بریگیڈ پر رات کے اندھیرے میں اچانک حملہ کیا۔ اس کارروائی کے نتیجے میں طالبان کے 2 اہلکار موقع پر ہلاک اور 3 دیگر شدید زخمی ہو گئے۔
تنظیم نے اپنے بیان میں واضح کیا ہے کہ ہلاک اور زخمی ہونے والے تمام طالبان اہلکار غیر مقامی تھے، جبکہ حملے کے دوران طالبان کی ایک فوجی گاڑی بھی مکمل طور پر تباہ کر دی گئی۔ این آر ایف نے دعویٰ کیا ہے کہ اس کارروائی میں ان کا کوئی جنگجو یا عام شہری زخمی نہیں ہوا۔
این آر ایف کا کہنا ہے کہ طالبان کے خلاف ان کی گوریلا کارروائیاں اس وقت تک جاری رہیں گی، جب تک افغانستان اور اس کے غیور عوام کو طالبان کی موجودہ حکمرانی سے مکمل نجات نہیں مل جاتی۔ دوسری جانب طالبان انتظامیہ نے این آر ایف کے اس دعوے پر تاحال کوئی باضابطہ تصدیق یا تردید جاری نہیں کی ہے۔
