وزیراعظم پاکستان شہباز شریف نے سعودی عرب پر ہونے والے حالیہ حملوں کی شدید ترین الفاظ میں مذمت کرتے ہوئے برادر ملک کے ساتھ مکمل یکجہتی کا اظہار کیا ہے۔
سوشل میڈیا پر جاری بیان میں وزیراعظم نے کہا کہ سعودی عرب کے خلاف کی گئی کارروائیاں اس کی خودمختاری اور علاقائی سالمیت کی کھلی خلاف ورزی ہیں، جس سے خطے کے امن و استحکام کو شدید نقصان پہنچ سکتا ہے۔
وزیراعظم شہباز شریف نے سعودی عرب کی سلامتی کے لیے پاکستان کی غیر متزلزل حمایت کا اعادہ کرتے ہوئے کہا کہ دونوں ممالک کے تاریخی اور برادرانہ تعلقات انتہائی مضبوط ہیں اور پاکستان ہمیشہ سعودی عرب کے امن و استحکام کے لیے اپنا کردار ادا کرتا رہے گا۔
دوسری جانب خلیج تعاون کونسل (جی سی سی) نے بھی سعودی عرب کے جنوبی علاقے پر حوثی ملیشیا کی جانب سے کیے گئے بیلسٹک میزائل حملے کی سخت ترین الفاظ میں مذمت کی ہے۔
خلیج تعاون کونسل کے سیکریٹری جنرل جاسم محمد البدیوی نے کہا کہ یہ دہشت گردانہ حملہ بین الاقوامی قوانین کی کھلی خلاف ورزی ہے۔ انہوں نے عالمی برادری پر زور دیا کہ وہ ان جارحانہ کارروائیوں کے خاتمے کے لیے حوثی ملیشیا کے خلاف سخت اور فیصلہ کن موقف اپنائے۔
