ایران نے امریکہ کی جانب سے مسلسل چھٹی رات فضائی حملوں کے جواب میں خلیجی ممالک میں امریکی فوجی تنصیبات پر نئے حملے کر دیے۔ ایرانی فوج نے دعویٰ کیا ہے کہ ڈرون حملوں میں کویت میں امریکی فوج کی تعیناتی اور لاجسٹک سپورٹ مراکز کو نشانہ بنایا گیا۔
ایرانی فوج نے بحرین کے سخیر ایئر بیس پر موجود امریکی ہیلی کاپٹروں اور جاسوس طیاروں کو بھی نشانہ بنانے کا دعویٰ کیا۔ ایرانی فوج کا کہنا ہے کہ وہ ہر قسم کے دباؤ اور دھمکیوں کا مقابلہ کرنے کے لیے مکمل طور پر تیار ہیں۔
دوسری جانب قطر کی وزارتِ دفاع نے بتایا کہ مسلح افواج نے ملک کو نشانہ بنانے والے متعدد میزائل حملے ناکام بنا دیے۔ قطری وزارتِ داخلہ کے مطابق حملوں کے دوران گرنے والے ملبے سے ایک بچہ زخمی ہوا۔ میڈیا رپورٹس کے مطابق دوحہ میں متعدد دھماکے سنے گئے، جبکہ شہریوں کو موبائل فونز پر سکیورٹی الرٹس جاری کیے گئے۔
بحرین میں بھی سائرن بجائے گئے اور شہریوں کو قریبی محفوظ مقامات پر جانے کی ہدایت کی گئی۔ واضح رہے کہ اس سے قبل ایرانی پاسدارانِ انقلاب نے دعویٰ کیا تھا کہ ایرانشہر میں شہداء کا بدلہ لینے کے لیے شام کے علاقے التنف میں امریکی اسپیشل آپریشنز کمانڈ سینٹر پر اچانک حملہ کیا گیا۔
پاسدارانِ انقلاب کے مطابق اس حملے میں ایک ریڈار سسٹم اور متعدد امریکی اسپیشل آپریشنز ہیلی کاپٹرز تباہ کیے گئے۔ تنظیم کا دعویٰ ہے کہ شہید ایرانی فوجیوں کے خون کا بدلہ لیتے ہوئے بڑی تعداد میں امریکی فوجیوں کو ہلاک کیا گیا۔