بلوچستان کے علاقے سوراب میں بارود سے بھری گاڑی میں ہونے والے قبل از وقت دھماکے نے بھارتی سرپرستی میں کام کرنے والی دہشت گرد تنظیم فتنۃ الہندوستان کی خونریز منصوبہ بندی کو بے نقاب کر دیا۔ ذرائع کے مطابق دھماکہ خیز مواد نصب کرنے کے دوران وقت سے پہلے ہونے والے اس دھماکے میں 8 دہشت گرد موقع پر ہی ہلاک اور متعدد زخمی ہو گئے۔
اس افسوسناک واقعے میں دہشت گردوں کے جمع کردہ بارود کے باعث 3 بے گناہ شہری بھی جاں بحق ہوئے، جو دہشت گرد نیٹ ورکس کی جانب سے عام آبادی کو لاحق مسلسل خطرے کی واضح مثال ہے۔
دھماکے کے فوراً بعد سکیورٹی فورسز اور بلوچستان پولیس نے علاقے میں مشترکہ کلیئرنس آپریشن شروع کیا، جس کے دوران فرار ہونے والے مزید 10 دہشت گرد جہنم واصل کر دیے گئے۔ اس طرح واقعے میں ہلاک ہونے والے فتنۃ الہند کے دہشت گردوں کی مجموعی تعداد 18 ہو گئی۔
فرار ہونے والے دہشت گردوں کے ساتھ جھڑپ کے دوران سکیورٹی فورسز کے 2 اہلکار بھی زخمی ہوئے، جنہیں فوری طبی امداد فراہم کی گئی۔
یہ واقعہ ایک بار پھر اس امر کی نشاندہی کرتا ہے کہ غیر ملکی سرپرستی میں کام کرنے والی فتنۃ الہند دہشت گردی اور بدامنی پھیلانے کے لیے دھماکہ خیز مواد تیار کرتے ہوئے بلوچ عوام کی جانوں کو کس طرح خطرے میں ڈال رہی ہے۔
سکیورٹی حکام کے مطابق علاقے میں بقیہ دہشت گردوں کے خاتمے اور ان کے سہولت کاری نیٹ ورک کو ملیامیٹ کرنے کے لیے سرچ اینڈ کلیئر آپریشن جاری ہے۔
پاکستان کی مسلح افواج اور قانون نافذ کرنے والے ادارے عزمِ استحکام کے تحت غیر ملکی سرپرستی اور سہولت کاری سے چلنے والی دہشت گردی کے مکمل خاتمے تک اپنی کارروائیاں جاری رکھنے کے عزم کا اعادہ کرتے ہیں۔