چین کے سفیر جیانگ زی ڈونگ نے وزارتِ خارجہ میں نائب وزیراعظم و وزیرِ خارجہ سینیٹر محمد اسحاق ڈار سے ملاقات کی۔ ملاقات کے دوران اسحاق ڈار نے گلگت بلتستان کے براڈ پیک میں برفانی تودہ گرنے کے حادثے میں چینی کوہ پیما کی المناک ہلاکت پر گہرے دکھ کا اظہار کرتے ہوئے تعزیت کی۔
انہوں نے میت کی وطن واپسی کے لیے پاکستان کی مکمل معاونت جاری رکھنے کی یقین دہانی کرائی۔ چینی سفیر نے حادثے کے بعد پاکستانی حکام کی جانب سے فوری امداد اور تعاون کو سراہا۔
ملاقات میں علاقائی صورتحال اور باہمی دلچسپی کے دیگر امور پر بھی تفصیلی تبادلہ خیال کیا گیا۔ سفیر جیانگ زی ڈونگ نے یومِ آزادی کے موقع پر پاکستانی عوام اور قیادت کو دلی مبارکباد پیش کی اور دونوں ممالک کے قریبی اور دیرینہ تعلقات کو مزید مستحکم بنانے کے عزم کا اعادہ کیا۔