خیبر پختونخوا کے ضلع بنوں میں پولیس اور سی ٹی ڈی نے مشترکہ کارروائی کرتے ہوئے 2 مشتبہ افراد کو گرفتار کر لیا۔
پولیس ذرائع کے مطابق تھانہ صدر کی حدود میں واقع بازار احمد خان میں پولیس اور سی ٹی ڈی نے انٹیلی جنس اطلاعات کی بنیاد پر مشترکہ آپریشن کیا۔ کارروائی کے دوران 2 مشتبہ افراد کو موقع سے گرفتار کر لیا گیا۔
پولیس کے مطابق گرفتار افراد کے قبضے سے 4 کلاشنکوف رائفلیں، 10 میگزین اور بینڈولیئرز برآمد ہوئے۔ اس کے علاوہ ایک ڈرون، 2 لیپ ٹاپ، 5 موبائل فون، ایک انفارمر ڈیوائس اور ایک خنجر بھی قبضے میں لیا گیا۔
پولیس حکام کے مطابق گرفتار ملزمان سے مزید تفتیش جاری ہے تاکہ ان کے مبینہ روابط اور برآمد ہونے والے سامان کے استعمال کے حوالے سے معلومات حاصل کی جا سکیں۔ اس ضمن میں مزید تفصیلات تاحال جاری نہیں کی گئیں۔
دیکھیے: کرک: خوارج کا تین پولیس مقامات پر کواڈ کاپٹر حملہ، 3 اہلکار زخمی