کراچی: سی ٹی ڈی اور حساس ادارے نے کورنگی کازوے ندی کے قریب مشترکہ کارروائی کرتے ہوئے ڈیفنس فیز 2 میں یومِ آزادی کے اسٹال پر فائرنگ میں ملوث 3 بھارتی سپانسرڈ دہشت گردوں کو گرفتار کر لیا ہے۔
ڈی آئی جی سی ٹی ڈی اظفر مہیسر نے پریس کانفرنس میں بتایا کہ 12 اگست کو سن سیٹ بولیوارڈ کے قریب دہشت گردوں نے قومی پرچم فروخت کرنے والے کورنگی کے رہائشی 35 سالہ شہری امن کو اس کی اہلیہ اور بچوں کے سامنے فائرنگ کر کے شہید کر دیا تھا، جس کا مقدمہ تھانہ ڈیفنس میں درج ہے۔
گرفتار ملزمان میں سجاد ملاح، ظفر علی اور فراز شامل ہیں، جن کے قبضے سے دستی بم اور پستول برآمد ہوئے ہیں۔ ڈی آئی جی کے مطابق دہشت گردوں کو بیرونِ ملک مقیم آقا کی جانب سے جشنِ آزادی کی سرگرمیوں کو سبوتاژ کرنے کا ٹاسک ملا تھا، جبکہ ملزمان پر 4 نئے مقدمات درج کر لیے گئے ہیں۔
ایس ایس پی سی ٹی ڈی عرفان بہادر کے مطابق سکیورٹی فورسز نے 900 سے زائد آپریشنز کرتے ہوئے 100 دہشت گرد گرفتار اور 4 کو ہلاک کیا، جس سے شہر میں دہشت گردی کے واقعات میں 78 فیصد کمی آئی ہے۔ حکام کا کہنا ہے کہ گرفتار ملزمان کے دیگر سہولت کاروں کا بھی سراغ لگا لیا گیا ہے۔
سی ٹی ڈی حکام کے مطابق دشمن عناصر اور کالعدم تنظیموں کی جانب سے معصوم شہریوں اور عام اسٹالز کو آسان ہدف بنا کر خوف پھیلانے کی کوشش کی گئی تھی۔ گرفتار ملزمان سے مزید تفتیش جاری ہے تاکہ اس نیٹ ورک کا مکمل صفایا ممکن بنایا جا سکے۔
