بھارتی سوشل میڈیا ہینڈلز کی جانب سے جعلی مواد پھیلا کر پاکستان اور اس کے سکیورٹی اداروں کو نشانہ بنانے کی ایک اور کوشش بے نقاب ہو گئی ہے۔
سوشل میڈیا پلیٹ فارم ایکس پر مبینہ بھارتی ہینڈلز کی جانب سے معروف صحافی کامران خان کے پروگرام کا ایک جعلی اور من گھڑت ویڈیو کلپ شیئر کیا گیا۔ اس کلپ میں ڈی جی میڈیا ونگ میجر جنرل محمد مشتاق علی کے حوالے سے یہ من گھڑت دعویٰ کیا گیا کہ پاکستان ففتھ جنریشن وارفیئر میں پیچھے رہ گیا ہے۔
حقائق کی جانچ سے یہ بات واضح ہو چکی ہے کہ یہ ویڈیو اے آئی ٹیکنالوجی کا سہارا لے کر تیار کی گئی ایک ڈیپ فیک اور من گھڑت ویڈیو ہے۔
سکیورٹی اور میڈیا تجزیہ کاروں کے مطابق روزِ اول سے بھارت کا یہ طریقہ کار رہا ہے کہ وہ جعل سازی، جعلی خبروں اور منظم پروپیگنڈے کے ذریعے اپنے مخالف کو معاشی، سیاسی اور عسکری محاذ پر کمزور دکھانے اور ناکام بنانے کی کوششیں کرتا ہے۔
بھارتی ہینڈلز اکثر اے آئی ٹیکنالوجی اور فرضی سوشل میڈیا اکاؤنٹس کو استعمال کر کے جعلی بیانیہ گھڑتے ہیں، تاکہ اپنے اندرونی اور عالمی عوامی حلقوں کو گمراہ کیا جا سکے۔
دیکھیے: خیبر پختونخوا: ٹی ٹی پی کے حق میں نعرے بازی کی وائرل ویڈیو جعلی نکلی
