سکیورٹی فورسز نے پنجگور کے علاقے کِلّی سوران میں خفیہ اطلاع پر کامیاب انٹیلی جنس بیسڈ آپریشن کیا، جس کے نتیجے میں 5 دہشتگرد ہلاک اور متعدد زخمی ہوگئے۔
ذرائع کے مطابق فورسز نے خفیہ اطلاعات کی بنیاد پر دہشتگردوں کی نقل و حرکت کا سراغ لگایا، جس کے بعد جدید ٹیکنالوجی کی مدد سے ان کے ٹھکانے اور سرگرمیوں کی نگرانی کی گئی۔ کارروائی کے دوران فورسز نے دہشتگردوں کے خلاف مؤثر ایکشن لیا۔
کارروائی کے بعد علاقے میں سرچ آپریشن بھی کیا گیا، تاکہ ممکنہ طور پر چھپے دیگر دہشتگردوں اور ان کے سہولت کاروں کا سراغ لگایا جا سکے۔
سکیورٹی ذرائع کے مطابق آپریشن کے دوران دہشتگردوں کے زیرِ استعمال 3 گاڑیاں اور 2 موٹر سائیکلیں برآمد کی گئیں۔ اس کے علاوہ ایک ایل ایم جی، 4 ایس ایم جیز، بڑی تعداد میں گولہ بارود، آئی ای ڈیز، واکی ٹاکی سیٹس اور دیگر دہشتگردی کا سامان بھی قبضے میں لے لیا گیا۔
ذرائع کا کہنا ہے کہ ہلاک ہونے والے دہشتگرد پنجگور اور گردونواح میں ڈکیتی، بھتہ خوری، اغوا برائے تاوان اور دہشتگردانہ کارروائیوں کی منصوبہ بندی سمیت دیگر جرائم میں ملوث تھے۔
سکیورٹی فورسز نے واضح کیا ہے کہ دہشتگردی کے مکمل خاتمے اور عوام کے جان و مال کے تحفظ کے لیے کارروائیاں جاری رکھی جائیں گی، جبکہ علاقے میں امن و استحکام کو یقینی بنانے کے لیے تمام ضروری اقدامات کیے جا رہے ہیں۔