شام کے وزیر خارجہ اسعد حسن الشیبانی نے وزیراعظم محمد شہباز شریف سے اہم ملاقات کی، جس میں دونوں ممالک کے درمیان دفاع، تجارت اور دیگر شعبوں میں تعاون بڑھانے پر گفتگو ہوئی۔
وزیراعظم نے شامی وزیر خارجہ اور ان کے وفد کا خیرمقدم کرتے ہوئے صدر احمد الشرع کے لیے نیک تمناؤں کا اظہار کیا اور ان کے ساتھ حالیہ رابطوں کا ذکر کیا۔ انہوں نے شام کی خودمختاری، وحدت اور علاقائی سالمیت کے لیے پاکستان کی غیر متزلزل حمایت کا اعادہ بھی کیا۔
وزیراعظم نے دونوں ممالک کے تاریخی اور کثیر الجہتی تعلقات کا ذکر کرتے ہوئے کہا کہ دیرینہ پاکستان شام دوستی کو سیاست، دفاع، تجارت، سرمایہ کاری، تعلیم اور افرادی قوت کی ترقی کے شعبوں میں مزید مضبوط تعاون میں تبدیل کرنے کی ضرورت ہے۔
پروازوں کی بحالی
وزیراعظم نے کہا کہ دونوں ممالک کے درمیان براہِ راست پروازوں کی بحالی سے عوامی روابط کو فروغ ملے گا اور پاکستان سے شام مذہبی زیارات کے لیے جانے والے زائرین کی بڑی تعداد کو سہولت میسر آئے گی۔
وزیراعظم نے شام کی وحدت، خودمختاری اور علاقائی سالمیت کے لیے پاکستان کی حمایت کا ایک بار پھر اعادہ کیا اور کہا کہ پاکستان گولان کی پہاڑیوں سے متعلق شام کے موقف کی مکمل حمایت جاری رکھے گا۔
شامی وزیر خارجہ کا مؤقف
شامی وزیر خارجہ نے صدر احمد الشرع کی جانب سے وزیراعظم کو نیک خواہشات پہنچائیں اور انہیں شام کی جاری سیاسی منتقلی اور تعمیرِ نو کی کوششوں سے آگاہ کیا۔ انہوں نے گزشتہ برسوں کے دوران پاکستان کی مسلسل حمایت پر شکریہ ادا کیا اور دوطرفہ روابط کو ابتدائی ادارہ جاتی طریقہ کار کے ذریعے فعال بنانے میں اپنی حکومت کی گہری دلچسپی کا اظہار کیا۔
وزیراعظم نے صدر احمد الشرع کو باہمی طور پر موزوں وقت پر پاکستان کے سرکاری دورے کی دعوت بھی دی۔ ملاقات میں نائب وزیراعظم و وزیر خارجہ سینیٹر محمد اسحاق ڈار، معاون خصوصی برائے وزیراعظم سید طارق فاطمی اور سیکریٹری خارجہ امنہ بلوچ بھی موجود تھے۔
