پاکستان نے غزہ کی پٹی میں اسرائیل کے مسلسل حملوں کی شدید الفاظ میں مذمت کرتے ہوئے بے گناہ شہریوں، بالخصوص خواتین اور بچوں کی ہلاکتوں پر گہری تشویش کا اظہار کیا ہے۔
ترجمان کے مطابق اسرائیلی کارروائیوں میں شدت ایسے وقت میں سفارتی کوششوں کو نقصان پہنچا رہی ہے جب غزہ تنازع کے خاتمے کے لیے عالمی سطح پر جامع اقدامات جاری ہیں۔
پاکستان نے خبردار کیا ہے کہ اسرائیلی جارحیت کے پورے خطے پر انتہائی تباہ کن اثرات مرتب ہو رہے ہیں اور موجودہ صورتحال مزید کشیدگی کا باعث بن سکتی ہے۔
حکومتی اعلامیے میں مطالبہ کیا گیا ہے کہ اسرائیل جنگ بندی معاہدے کے تحت اپنے وعدوں کی پاسداری کرے اور ایسے اقدامات سے گریز کرے جو معاہدے کو کمزور کریں۔
پاکستان کے مطابق صدر ٹرمپ کی قیادت میں قائم بورڈ آف پیس اور اقوام متحدہ کی سلامتی کونسل کی قرارداد 2803 کی توثیق کے تحت عالمی برادری جنگ بندی یقینی بنانے کی کوشش کر رہی ہے۔
اعلامیے میں اس بات پر زور دیا گیا ہے کہ بورڈ آف پیس اور اسرائیلی حکام کے درمیان مذاکراتی عمل میں تعمیری پیش رفت کو کسی بھی صورت متاثر نہیں ہونا چاہیے۔
پاکستان نے عالمی برادری سے ایک بار پھر اپیل کی ہے کہ وہ اسرائیل پر مؤثر دباؤ ڈالے تاکہ جنگ بندی کے مکمل احترام اور غزہ میں مزید کشیدگی کو روکا جا سکے۔
