بین الاقوامی کریڈٹ ریٹنگ ایجنسی موڈیز نے پاکستان کی خودمختار کریڈٹ ریٹنگ سی اے اے ون سے بڑھا کر بی تھری کر دی، جبکہ ریٹنگ کا آؤٹ لک مستحکم برقرار رکھا گیا ہے۔
ماہرین کے مطابق کریڈٹ ریٹنگ میں یہ بہتری ملکی معیشت اور قرضوں کی ادائیگی کی صلاحیت پر بڑھتے عالمی اعتماد کی عکاس ہے۔ بی تھری ریٹنگ کو پاکستان کی معاشی بحالی اور مالیاتی استحکام کی جانب ایک اہم پیشرفت قرار دیا جا رہا ہے۔
ماہرینِ معیشت کا کہنا ہے کہ عالمی ریٹنگ ایجنسی کا یہ اپ گریڈ پاکستان کی بہتر ہوتی معاشی اور مالیاتی پوزیشن کا واضح اعتراف ہے۔ بہتر کریڈٹ ریٹنگ سے عالمی سرمایہ کاروں کے اعتماد میں اضافہ اور بین الاقوامی مالیاتی منڈیوں تک پاکستان کی رسائی میں بہتری کی راہ ہموار ہو سکتی ہے۔
وزیراعظم کا خیرمقدم
وزیراعظم شہباز شریف نے موڈیز کی جانب سے پاکستان کی کریڈٹ ریٹنگ سی اے اے ون سے بڑھا کر بی تھری کرنے پر قوم کو مبارکباد دیتے ہوئے اس پیشرفت کا خیرمقدم کیا۔ انہوں نے حکومتی معاشی ٹیم کی کاوشوں کو سراہتے ہوئے کہا کہ نائب وزیراعظم و وزیر خارجہ اسحاق ڈار، آرمی چیف فیلڈ مارشل سید عاصم منیر، وزیر خزانہ محمد اورنگزیب اور تمام متعلقہ حکام اس کامیابی کے لیے قابلِ تحسین ہیں۔
معاشی پالیسیوں پر عالمی اعتماد
وزیراعظم نے کہا کہ پاکستان کی کریڈٹ ریٹنگ میں بہتری حکومت کی معاشی پالیسیوں اور اصلاحات پر عالمی اعتماد کا مظہر ہے۔ ان کا کہنا تھا کہ بین الاقوامی مالیاتی اداروں اور ریٹنگ ایجنسیوں کی جانب سے پاکستان کی معاشی صورتحال میں بہتری کا اعتراف خوش آئند ہے، اور ملکی معیشت استحکام کی جانب گامزن ہے۔
انہوں نے واضح کیا کہ حکومت نے معیشت کو مستحکم کرنے اور بیرونی شعبے میں بہتری کے لیے مؤثر اقدامات کیے ہیں، اور معاشی استحکام کے تسلسل کے لیے اصلاحات کا عمل جاری رہے گا۔